Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow sişenbe güni Aşgabatda “Türkmenistan ABŞ” işewürler geňeşiniň Ýerine ýetiriji direktory Erik Stýuart bilen duşuşdy. Onuň dowamynda Türkmenistanyň ABŞ bilen ikitaraplaýyn gatnaşyklary mundan beýläk-de ösdürmäge taýýardygy tassyklanyldy. Bu barada Türkmenistanyň resmi metbugaty habar berýär.
E.Stýuart ikiçäk gepleşikleri geçirmäge döredilen mümkinçilik üçin hoşallyk bildirip, ABŞ-nyň işewür toparlarynyň netijeli we özara bähbitli işlemegi üçin ähli şertler döredilen türkmen bazaryna uly gyzyklanma bildirýändiklerini belledi. Söhbetdeşligiň dowamynda Erik Stýuart Türkmenistanda tebigata aýawly çemeleşmek, onuň biodürlüligini gorap saklamak hem-de baýlaşdyrmak, ekologik abadançylygy üpjün etmek boýunça durmuşa geçirilýän giň gerimli işleriň dünýä nusgalykdygyny belledi.
Ol şeýle hem Türkmenistanyň öňe sürýän ekologiýa ugurly başlangyçlarynyň halkara jemgyýetçilikde uly goldawa eýe bolýandygyny aýtdy. Bu üstünlikler türkmen halkynyň Milli Lideriniň başyny başlan döwlet ekologiýa syýasatynyň netijesinde hasyl boldy.
Türkmenistanyň Halk Maslahatynyň Başlygy berlen ýokary baha üçin minnetdarlyk bildirip, Türkmenistanyň ekologiýa ulgamynda halkara düzümler, şol sanda BMG bilen işjeň hyzmatdaşlyk alyp barýandygyny belledi.Türkmenistanyň başlangyçlary bilen BMG-niň Baş Assambleýasynyň 2024-nji ýylda kabul eden Kararnamalaryna aýratyn üns çekildi. Şolaryň hatarynda “2025-nji ýyl — Halkara parahatçylyk we ynanyşmak ýyly”, “Merkezi Aziýa — parahatçylyk, ynanyşmak we hyzmatdaşlyk zolagy” ýaly Kararnamalar bar.
Duşuşygyň dowamynda taraplar Türkmenistan bilen ABŞ-nyň arasynda hyzmatdaşlyk gatnaşyklaryň ösdürilýändigini bellediler. Söwda-ykdysady, energetika, oba hojalygy, ulag, ýokary tehnologiýalar ulgamlaryndaky hyzmatdaşlykda amerikan kompaniýalarynyň wajyp orny bellenildi. Türkmen halkynyň Milli Lideri amerikan kompaniýalarynyň strategik taýdan möhüm ugurlarda üstünlikli alyp barýan işlerine kanagatlanma bildirip, hyzmatdaşlygy ösdürmäge gyzyklanma bildirilýändigini beýan etdi.
Duşuşygyň ahyrynda Gurbanguly Berdimuhamedow iki döwletiň arasynda özara gatnaşyklary giňeltmäge goşan goşandy üçin “Türkmenistan ABŞ” işewürler geňeşiniň Ýerine ýetiriji direktory Erik Stýuarta minnetdarlyk bildirdi.