Türkmenistanda senagat ähmiýetli kükürtsiz tebigy gaz ýatagy tapyldy. Bu barada prezident Gurbanguly Berdimuhamedowa 17-nji maýda geçirilen hökümet maslahatynda wise-premýer Myratgeldi Meredow hasabat berdi.
TDH-nyň habar bermegine görä, “Türkmengeologiýa” döwlet korporasiýasy Lebap welaýatynyň Çärjew etrabynyň çäklerinde ýerleşen “Täjibaý” diýen geljegi uly meýdançada barlag geçirdi.
Bu ýerde 2 müň 400 metr çuňlugy bolan guýynyň buraw işleri tamamlanyp, ol ýerden senagat ähmiýetli kükürtsiz tebigy gazyň akymy alyndy.
Häzirki wagtda Türkmengaz döwlet konserniniň ylmy-barlag instituty tarapyndan täze açylan ýatagyň gorlaryny hasaplamak işleri alnyp barylýar.
Döwlet baştutany wise-premýere täze nebit-gaz ýataklaryny senagat taýdan ulanmaga girizmek boýunça işleri işjeňleşdirmegi tabşyrdy.
Ýatladýarys, 2018-nji ýylyň oktýabr aýynyň aýagynda Gurbanguly Berdimuhamedow “Türkmengeologiýa” döwlet korporasiýasynyň başlygyndan täze ýataklary gözläp tapmagy talap etdi.
Myratgeldi Meredow hasabat 18-nji ýanwarda prezidente ýurtda arassa agyz suwunyň täze gorunyň, şeýle-de ýerli gurluşyk materiallaryny öndürmäge mümkinçilik berjek magdanyň tapylandygy barada hasabat berdi.
Aprelde Balkan welaýatynda demir-jöwher ýatagy açyldy.