19-njy martdaky wideoşekilli iş maslahatynda Balkan welaýatynyň häkimi Ýaztagan Gylyjow prezidentiň garamagynda Türkmenbaşy şäherinde gurulmagy planlaşdyrylýan iki hassahananyň taslamasyny hödürledi.
TDH-nyň habar bermegine görä, köpugurly hassahana 400 orunlyk, ýokanç keseller hassahanasy 100 orunlyk bolar.
Prezident Gurbanguly Berdimuhamedow saglygy goraýyş desgalarynyň hödürlenen taslamasyny makullady we olaryň ýokary hilli gurluşygynyň üpjün edilmegini we öz wagtynda gurlup gutarylmagyny, döwrebap enjamlaşdyrylmagyny tabşyrdy.
Saglygy goraýyş desgalaryny Ussat Inžener we Çeper Gurluşyk hususy kompaniýalary gurýar. Gurluşyk işleri 2019-njy ýylyň martynda başlanyp, desgalar 2021-nji ýylyň iýulynda doly taýýar edilip, ulanmaga berler.
Ýatladýarys, prezident fewralyň ortasynda Daşoguzda hassahana we onkologiýa klinikasyny gurmagy tassyklady.