"Türkmennebit" döwlet konsernine Balkan welaýatynyň Türkmenbaşy şäheriniň Ruhnama köçesiniň ugrunda 4 sany 4 gatly, her biri 40 öýli ýaşaýyş jaýlarynyň taslamalaryny düzmek we olary ýanaşyk ýerlerini abadanlaşdyryp gurmak barada "Iner" hojalyk jemgyýeti bilen şertnama baglaşmaga ygtyýar berildi. Türkmenistanyň Prezidenti Serdar Berdimuhamedow 26-njy noýabrda degişli Karara gol çekdi. Bu barada "Watan" habarlar gepleşiginde habar berildi.
Gurluşyk işlerine 2024-nji ýylyň noýabr aýynda başlamak we ýaşaýyş jaýlaryny 2026-njy ýylyň noýabr aýynda ulanmaga doly taýýar edip tabşyrmak bellenildi.
Resminama Berkarar döwletiň täze eýýamynyň Galkynyşy döwründe "Türkmenistany 2024-nji ýylda durmuş-ykdysady taýdan ösdürmegiň we maýa goýum Maksatnamasynda" bellenen wezipeleri üstünlikli durmuşa geçirmek we ýurduň ilatynyň ýaşaýyş-durmuş şertlerini has-da gowulandyrmak hem-de ilaty döwrebap ýaşaýyş jaýlary bilen üpjün etmek maksady bilen kabul edildi.