Türkmenistanyň ýygyndy topary Ýapyk binalarda we söweş sungaty boýunça V Aziýa oýunlarynda medallar ugrunda bäsleşmegini dowam etdirýär.Yklymlaýyn ýaryşyň badalga alan gününden bäri türgenlerimiz şowly çykyşlary we gazanýan medallary bilen guwandyryp gelýärler.
Guşakly göreş, taýboks, agyr atletika, kuraş, konkur boýunça ýaryşlardaky çykyşlar biziň türgenlerimize hormat münberine çykmaga ýardam etdi. Şu ýylyň 22-nji sentýabrynyň öýlänine çenli “Aşgabat 2017” oýunlarynda milli ýygyndy toparlarymyz 153 medal: 59 altyn, 43 kümüş, 51 bürünç medal gazandylar.
Türkmen türgenleri umumy hasapda ýaryşyň ilkinji gününden bäri birinjiligi elden bermän gelýärler.Ýurdumyzyň türgenleriniň gazanýan ynamly ýeňişleri olaryň yklymyň iri sport ýaryşyna ýokary derejede taýýarlykly gelendiginiň subutnamasydyr.Olimpiýa şäherçesiniň metbugat merkezinde daşary ýurtly hem-de ýerli žurnalistleriň gatnaşmagynda yzygiderli geçirilýän media forumlarda “Aşgabat 2017” oýunlarynyň çäklerindäki ýaryşlaryň ýokary guramaçylyk ýagdaýynda dowam edýändigi bellenilýär. Ýaryş meýdançalarynda köpçülikleýin habar beriş serişdeleriniň wekilleriniň işlemegi üçin ähli mümkinçilikleriň döredilýändigi has-da buýsandyryjydyr.AGYR ATLETIKADAKYILKINJI ALTYN MEDALTürkmen türgeni agyr atletika ugry boýunça ynamly gazanan ilkinji altyn medaly bilen ildeşlerimizi begendirdi.
Bu medal 1994-nji ýyldan soňra Aziýa oýunlarynda gazanylan ilkinji altyn medaldyr.Ol hem 77 kilogram agram derejesinde çykyş eden ildeşimiz Rejepbaý Rejepowa başartdy.Onuň silterläp hem-de itekläp götermek babatda gazanan 353 baly ýeňiş gazanmaga mümkinçilik berdi.Ildeşimiz Rejepbaý Rejepow özbek türgeni Şahzod Hudaýbergenow bilen soňuna çenli bäsleşdi.
Her iki türgen hem ýaryşyň baş baýragyny almak üçin elinde baryny etdi.Rejepbaý Rejepow soňky gezek ştangany ynamly galdyryp, ýurdumyzyň ýaşyl Tuguny al-asmanda parlatdy.Umuman, “Aşgabat 2017” oýunlarynda ýaryşlar gyzgalaňly hem-de çekeleşikli dowam edýär.
Häzire çenli türkmen halkyny hem-de milli Liderimizi begendirip gelýän türkmen türgenlerimize mundan soňky bäsleşiklerde-de şowlulyk arzuw edýäris!