AFK Kubogynda çykyş edýän iki klubumyz hem toparçalaryndaky 2-nji duşuşyklarynda ýeňiş gazandy.Az salym öň tamamlanan duşuşyklarda “Altyn asyr” hem-de “Köpetdag” toparlary gyrgyz toparlaryndan 1-0 hasabynda üstün çykmagy başardy. Ýurdumyzyň çempiony “Altyn asyr” topary “E” toparçada Gyrgyz Respublikasynyň “Neftçi” toparyny Duşanbede 1-0 hasabynda ýeňdi.
Aragatnaşykçylara ýeňiş getiren ýeke-täk goly 34-nji minutda Myrat Annaýew penaltiden geçirdi. Şeýlelikde, “Altyn asyr” topary utugyny 4-e çykardy. “Altyn asyr” 30-njy iýunda “Sogdiana” bilen jemleýji duşuşygyny geçirer. “Altyn asyr” topary 1-nji duşuşygynda Täjigistanyň “SSKA Pamir” topary bilen 1-1 deňme-deň oýnapdy.
“F” toparçada çykyş edýän “Köpetdag” kluby hem Gyrgyz Respublikasynyň başga bir topary “Dordoý” bilen Bişkekde duşuşdy. 8-nji minutda bir oýunçysy (Yhlas Saparmämmedow) gyzyl kart alyp, 80 minutdan gowrak wagty 10 futbolçy bolup oýnan “Köpetdag” 1-0 hasabynda ýeňiş gazandy.
Ildeşlerimize ýeňiş getiren goly 45-nji minutda Begenç Akmämmedow öz adyna ýazdyrdy. Şeýlelikde, ilkinji 3 utugyny gazanan “Köpetdag” ýaryşy ýeňiş bilen tamamlady.Mälim bolşy ýaly, “Köpetdag” Täjigistanyň “Hujand” toparyndan 3-1 asgyn gelipdi.