Telekeçi Perhat Babaýewiň Ahal welaýatynyň Ak Bugdaý etrabynda ýerleşýän kärhanasy ýerli bazary “Täsin älem” haryt nyşanly döwrebap ýatak matraslary bilen üpjün edýär.
“Rysgal” gazetiniň duşenbe güni habar berşi ýaly, 2020-nji ýylda işe girizilen kärhanada her gün 40-50 sany taýýar önüm öndürilýär. Olaryň galyňlygy 18-32 santimetr, uzynlygy 2 metr, ini 90 santimetrden 2,2 metre çenli üýtgeýär.
Kärhana Türkiýäniň ösen tehnologiýalary bilen doly enjamlaşdyrylyp, müşderilere aýry-aýry ululykdaky matraslary sargyt etmek mümkinçiligini hem berýär.
Habarda bellenilişi ýaly, kärhana ýatak matraslardan başga-da, müşderileriň uly isleg bildirýän dürli ýorganlaryň we ýassyklaryň önümçiligini hem alyp barýar.
Perhat Babaýew Türkmenistanyň Senagatçylar we Telekeçiler Birleşmesiniň agzasy bolup, onuň kärhanasynda 35 hünärmen zähmet çekýär.