21-nji aprelde onlaýn aragatnaşygy arkaly türkmen-italýan iş toparynyň medeni hyzmatdaşlyk boýunça 1-nji duşuşygy geçirildi. Ol Türkmenistanyň Italiýa Respublikasyndaky Adatdan daşary we doly ygtyýarly ilçisi Toýly Kömekowyň oktýabr aýynda Italiýanyň Medeniýet ministriniň diplomatiýa işleri boýunça maslahatçysy bilen geçiren duşuşygynyň dowamyna öwrüldi.
Duşuşykda Italiýanyň wekilleri hökmünde medeniýet ministriniň orunbasary Wirto D’Adamonyň ýolbaşçylygynda Italiýanyň Medeni miras, medeniýet işi we syýahatçylyk ministrliginiň hünärmenleri gatnaşdylar. Türkmenistanyň adyndan bolsa medeni we jemgyýetçilik edaralarynyň wekilleri çykyş edip, oňa ýurduň Medeniýet ministriniň orunbasary ýolbaşçylyk etdi.
Ikitaraplaýyn bähbitli geçen duşuşygyň temasy taryhy ýerleri we medeni gymmatlyklary gorap saklamak, arhiw işinde, gymmatlyklary dikeltmekde hem-de milli mirasyň sungat eserlerini bejermekde tejribeleri alyşmak bilen bagly bolup, ÝUNESKO-nyň maksatnamalarynyň çäklerinde medeniýet we ylym pudagynda türkmen-italýan hyzmatdaşlygynyň meselelerini ara alyp maslahatlaşmak boldy.
Mundan başga-da, geljekde özara hyzmatdaşlygyň çäklerinde arheologlar we gaýtadan dikeldiji hünärmenler üçin onlaýn-seminarlary hem-de taýýarlyk okuwlaryny guramak, wokalistler we aýdymçy-sazandalar üçin Türkmenistanyň hem-de Italiýanyň milli saz gurallarynda ýörite okuwlary, şeýle-de Italiýanyň muzeýleriniň birinde türkmenleriň bürünç asyryna degişli ýadygärliklerini, Gadymy Merwiň we Parfiýanyň gymmatlyklaryny açyp görkezýän sergileri geçirmek barada bellenildi.