16 — 19-njy dekabr aralygynda Bedenterbiýe we sport uniwersitetleriniň halkara birleşiginiň agzalygyna resmi kabul etmek dabarasyna hem-de ugurdaş halkara çärelerine gatnaşmak üçin Türkmen döwlet bedenterbiýe we sport institutynyň Talyplar sport klubynyň başlygy S.Gurdow, Ylym bölüminiň hünärmeni B.Öwezow Gazagystan Respublikasynyň Almaty şäherine iş saparyny amala aşyrýarlar.
Türkmenistanyň Bilim ministirliginiň resmi saýtynda berilýän habara görä, 17-nji dekabrda Gazak sport we syýahatçylyk akademiýasynyň esaslandyrylmagynyň 80 ýyllygy mynasybetli geçirilen Hemmeler üçin olimpiýa sporty we sport atly halkara ylmy maslahatyna Türkmen döwlet bedenterbiýe we sport institutynyň Almaty şäherinde iş saparynda bolýan wekilleri, şeýle hem ýokary okuw mekdebiniň binýadynda professor-mugallymlar, talyp ýaşlar wideoaragatnaşyk ulgamy arkaly gatnaşdylar.
Ugurdaş çäreleriň hatarynda Türkmen döwlet bedenterbiýe we sport institutynyň dünýä jemgyýetçiliginde öňdebaryjy sport ugurly ýokary okuw mekdeplerini birleşdirýän Bedenterbiýe we sport uniwersitetleriniň halkara birleşiginiň agzalygyna resmi kabul edilişik dabarasy bolar. Şeýle hem halkara bilermenleriniň gatnaşmagynda bedenterbiýe we sport ugry boýunça mugallymlardyr tälimçiler üçin Okuw-türgenleşik tapgyrlaryny guramagyň häzirki zaman çemeleşmeleri atly hünär derejesini ýokarlandyryş okuwlary geçiriler.
Şonuň ýaly-da, sport boýunça ylmy-barlag institutynyň alyp barýan işleri bilen tanyşlyk, Gazak sport we syýahatçylyk akademiýasy bilen Türkmen döwlet bedenterbiýe we sport institutynyň arasynda hyzmatdaşlyk etmek hakynda Ähtnamanyň taslamasyny ara alyp maslahatlaşmak ýaly möhüm ugurlar göz öňünde tutulýar diýlip, habarda bellenilýär.