Türkmenistanyň Katar Döwletindäki ilçisi Myratgeldi Seýitmämmedow Kataryň Söwda-senagat edarasynyň baş direktory Aly Said Bu Şarbak Al-Mansuri bilen duşuşdy.
Türkmenistanyň Katar Döwletindäki ilçihanasynyň metbugat gullugynyň habar bermegine görä, taraplar ikitaraplaýyn söwda-ykdysady hyzmatdaşlygy ösdürmegiň geljegini, şeýle-de azyk senagaty, oba hojalygy we gurluşyk ýaly ugurlarda hyzmatdaşlygy ýola goýmagyň mümkinçiliklerini ara alyp maslahatlaşdylar.
Duşuşygyň dowamynda türkmen diplomaty iki ýurduň telekeçileriniň arasynda gönüden-göni aragatnaşyklaryň ýola goýulmagynyň, şeýle hem Türkmen-katar işewürler geňeşiniň ilkinji mejlisiniň geçirilmeginiň bu ugurdaky hyzmatdaşlygyň giňelmegine güýçli itergi berjekdigini nygtady.
Mundan başga-da, ilçisi M.Seýitmämmedow duşuşmaga wagt tapandygy üçin Kataryň Söwda-senagat edarasynyň baş direktoryna minnetdarlyk bildirdi hem-de iki ýurduň degişli edaralarynyň arasynda özara söwda-ykdysady hyzmatdaşlygy dowam etdirmegiň möhümdigini belledi.