Şu günler Oguz han adyndaky Türkmenfilm birleşigi tarapyndan Magtymguly Pyragy hakynda dokumental filmleri surata düşürmek taslamasy bilen meşgullanýan režissýor Hekim Alowowyň ýolbaşçylygyndaky topar Türkiýe Respublikasyna döredijilik saparynda bolýar.
Türkmen režissýorynyň ýolbaşçylygyndaky topar Ankara şäherinde türkmen halkynyň akyldar şahyry Magtymguly Pyragy barada dokumental filmi üçin birnäçe wideo sýužetleri ýazgy etdiler. Türkmen döredijilik topary Türkiýe Respublikasynyň paýtagty Ankara şäherinde Magtymguly Pyragyny öwrenijiler bilen duşuşyp, olardan beýik akyldar şahyr barada gyzykly maglumatlary aldylar.
Mälim bolşy ýaly, 2012-nji ýylda Türkiýäniň paýtagtynyň tebigy taýdan owadan künjeginde ýerleşýän Türkmenistan seýilgähinde Magtymguly Pyragynyň ýadygärligi açyldy. Türki medeniýetiň halkara guramasynyň (TÜRKSOÝ) baş edarasy bu şäherde ýerleşýär. Bu gurama Magtymguly Pyragynyň doglan gününiň 300 ýyllygyna bagyşlanan çärelere işjeň gatnaşýar.
Mälim bolşy ýaly, Türki medeniýetiň halkara guramasynyň geçen güýzde geçirilen Hemişelik geňeşiniň mejlisine gatnaşanlar Magtymguly Pyragynyň hormatyna TÜRKSOÝ-nyň çäklerinde 2024-nji ýylyň Türki dünýäniň beýik şahyry we akyldary Magtymguly Pyragy ýyly diýip, yglan etmek teklibini biragyzdan goldadylar.
Geljek ýyl Magtymguly Pyragynyň doglan gününiň 300 ýyllygy halkara derejesinde bellenilip geçiler. Şunuň bilen baglylykda, Oguz han adyndaky Türkmenfilm birleşigi Türkiýe, Eýran, Russiýa Federasiýasynyň Astrahan oblastlarynda Pyraga bagyşlanan dokumental filmleri surata düşürýär.