Futbol boýunça 17-nji Ýewropa çempionatynda iň soňky çärýek finalçy hem belli boldy. Çekeleşikli geçen oýundan soň Türkiýäniň ýygyndysy adyny yklym ýaryşynyň iň gowy 8 toparynyň hataryna ýazdyrdy.
Leipsig şäherindäki “Red Bull Arena” stadionynda oýnalan oýna Awstriýanyň ýygyndysy esasy faworit bolup çykdy. Ýöne oýnuň eýýäm 1-nji minudy dolmanka, has takygy, 57-nji sekuntda goragçy Merih Demiral hasaby açdy.
Bu çempionatyň taryhyndaky iň çalt 3-nji, pleý-off tapgyrynyň bolsa iň çalt goly hökmünde hasaba alyndy.Duşuşygyň 1-nji ýarymy şol hasap bilenem tamamlandy.Oýnuň 2-nji ýarymynyň ilkinji minutlarynda-da janköýerler 2 goluň şaýady boldular.
Olaryň ikisi-de edil 1-nji gol ýaly burçdan urguda derwezä girizildi.Duşuşygyň 59-njy minutynda ýene-de Merih Demiral bu gezek kelle urgusy bilen tapawutlanyp, Türkiýäniň ýygyndysynyň peýdasyna hasaby 2-0-a ýetirdi.
Bu goldan 7 minut soň, ýagny 66-njy minutda oýna soň goşulan Gregoriç aratapawudy 1 gola düşürdi. Şondan soňam Awstriýanyň ýygyndysy hasaby deňlemek üçin tagalla baryny etdi.Duşuşygyň iň soňky sekuntlarynda türkiýeli derwezeçi Mert Günok derwezä barýan topy saklap, toparyny goldan halas etdi. Şunlukda, 2-1 hasabynda ýeňiş gazanan Türkiýäniň ýygyndysy 2000-nji we 2008-nji ýyllardan soň 3-nji gezek çärýek finala çykdy.
Fransiýadyr Niderlandlar ýaly güýçli ýygyndylarda öňe saýlanyp, toparçasynda 1-nji orny eýelän we bassyr 2-nji gezek 1/8 finala çykan Awstriýanyň ýygyndysy ilkinji sapar çärýek finala çykmak mümkinçiligini ýene bir ýola elden giderdi.
Türkiýäniň ýygyndysy şenbe güni, 6-njy iýulda çärýek finalda Niderlandlaryň ýygyndysy bilen duşuşar.