Star gazedi: "Erdogan: PKK/YPG-ni söhbetdeş hökmünde görmek kabul ederliksiz" söz başyly habarynda, Türkiyäniň Prezidenti Rejep Taýýip Erdoganyň Birleşen Arap Emirlikleriniň Döwlet baştutany Şeýh Al Nahaýan bilen telefon arkaly söhbetdeş bolandygyny habar berýär.
Erdogan Türkiyäniň Siriýada iş alyp barýan terror guramasy PKK/ÝPG-niň sebitdäki kürtleriň wekili we söhbetdeş hökmünde görülmeginiň kabul ederliksizdigini, DAIŞ-iň sebitdäki bulam bujarlykdan peýdalanmagyna böwet bolmagyň we Ysraýylyň häzirki ýagdaýdan hyýanatçylykly peýdalanyp, Siriýadaky täze tapgyra ýaramaz täsir ýetirmeginiň öňüniň alynmagynyň zerurdygyny belläp geçdi.
Ýeni Şafak gazedi: "Türk energetika wekiliýeti ýagdaýy gözden geçirmek üçin Damaska bardy" söz başyly habarynda, Türkiyäniň Siriýanyň energiýa infrastrukturasyny işjeň ýagdaýa getirmek we ýol kartasynyň düzülmegi bilen bagly işleri kesgitlemek üçin Damaska wekiliýet ugradandygyny beýan edýär.
Watan gazedi: "Baýraktar: Şyrnakda gündelik nebit önümçiligi 70 müň barrelden geçdi" söz başyly habarynda, Energetika we tebigy serişdeler ministri Alparslan Baýraktaryň: "Şyrnak möhüm welaýatlarymyzyň birine öwrüldi, esasan hem energetika we nebit üçin. Bu ýerde şu günden başlap önümçiligimiz 70 müň barrelden geçdi" diýendigini aýan edýär.
Sabah gazedi: "TOGG 20 aýda 72 göterim ýerli derejeden geçdi" söz başyly habarynda, Ýerli awtoulag TOGG-yň satylmaga başlamagynyň 20-nji aýynda Senagat we tehnologiýa ministrliginiň çap eden ýerli önüm görkezmesine laýyklykda 72,18 göterim ýerli derejä ýetendigini okyjy köpçüliginiň dykgatyna ýetirýär.
Hürriýet gazedi: "HÜRKUŞ ilkinji uçuşyny amala aşyrdy" söz başyly habarynda, Türkiyäniň Harby-howa güýçleriniň uçarmanlara tälim bermek zerurlyklaryny kanagatlandyrmak we goranyş senagat mümkinçiliklerini has hem ösdürmek maksady bilen TUSAŞ tarapyndan öndürilen HÜRKUŞ-yň ilkinji uçuşyny amala aşyrandygyny habar berýär. 20 minutlyk uçuş wagtynda 6500 fut beýiklige we 140 düwün tizlige ýetildi.