Sabah gazedi: "Erdogan: Siriýadaky terrorçylyk guramalar ýok ediler" söz başyly habarynda, prezident Rejep Taýýip Erdoganyň Siriýanyň halkynyň onlarça ýyl dowam eden zulum düzgünini ýumuryp, azatlygyna eýe bolandygyny aýdandygyny habar berýär. Erdogan: "Ýurduň beýleki ýerlerindäki DAIŞ we PKK/PÝD ýaly terror guramalary hem iň gysga wagtda ýok ediler" diýip belledi.
Watan gazedi: "MHG Kamyşlyda terror guramasy ÝPG-e zarba saldy" söz başyly habarynda, Türkiyäniň Milli howpsuzlyk gullugynyň terror guramasy PKK/ÝPG-niň Siriýanyň Kamyşly sebitinde Asada tabynlykdaky güýçlerden alan raketa, agyr ýarag ulgamlary we ok-däriler bilen doldurylan 12 aýry ýük ulagyny, 2 tanky we 2 ok-däri ammaryny ýok edendigini mälim edýär.
Haber Türk gazedi: "Prezident Erdoganyň diplomatik tagallalary dowam edýär" söz başyly habarynda, Türkiyäniň prezidenti Rejep Taýýip Erdoganyň Italiýanyň premýer ministri Jorjiýa Meloni we Ýewropa Komissiýasynyň başlygy Ursula fon der Lýaýen bilen telefon arkaly söhbetdeş bolandygyny okyjy köpçüliginiň dykgatyna ýetirýär. Geçirilen telefon söhbetdeşliklerinde Siriýadaky wakalar ara alynyp maslahatlaşyldy.
Hürriýet gazedi: "Erdogan: Siriýanyň täze dolanşygyna goldaw bermäge taýýardyrys" söz başyly habarynda, prezident Rejep Taýýip Erdoganyň Siriýada täze dolanşygyň Siriýanyň bütin halkyny öz içine aljak ýagdaýda tutum alyp barmagyny umyt edýändiklerini, täze dolanşyga zerur bolan islendik meselede goldaw bermäge taýýardyklaryny aýdandygyny aýan edýär.
Star gazedi: "Türkiyäniň serhetaşa nebit we tebigy gaz göçümi" söz başyly habarynda, Türkiyäniň energetika we tebigy serişdeler ministri Alparslan Baýraktaryň, Yrak, Liwiýa, Afrika, Orta Aziýa, Kawkaz geografiýasy we Günorta Amerika sebitlerindäki halkara hyzmatdaşlar bilen nebit we tebigy gaz önümçiligini artdyrmagy maksat edinýändiklerini aýdandygyny beýan edýär.