“Haber Türk” gazeti “Erdoganyň terrorizme garşy göreş hakyndaky ýüzlenmesi” söz başyly habarynda, Prezident R.T.Erdoganyň terrorizme garşy göreşiň soňky terrorçy ýok edilýänçä dowam etjekdigini aýdandygyny ýazýar. Terror koridorynyň açylmagyna ýol bermejekdiklerini ýene-de bir gezek nygtan Erdogan, Siriýanyň demirgazygyny terrordan saplajakdyklaryny beýan etdi.
“Ýeni Şafak” gazeti “Global halal bazary Stambulda açyldy” söz başyly habarynda, Bütindünýä halal sammitiniň Stambulyň Sergi merkezinde açylandygyny mälim edýär. Dünýäniň halal azyk bazarynyň 70 göterimini emele getirýän Yslam Hyzmatdaşlyk Guramasyna agza we synçy 60 ýurduň ministrleri hem-de söwda wekiliýetleri Ministrleriň halkara maslahatyna ganaşarlar.
“Hürriýet” gazeti “Erdogan: Halal bazary ösmäge dowam edýär” söz başyly habarynda, Prezident R.T.Erdoganyň arassa, saglyga peýdaly we ynamly azyga bolan zerurlygyň hemişekisinden has ýokary duýulýandygyny aýdandygyny mälim edýär. Halas belgili azyklaryň we hyzmatlaryň arassa, saglyga peýdaly we dini ynançlara laýyk gelýändigine ünsi çeken Erdogan, halal bazarynyň ösmäge dowam edýändigini aýtdy.
“Sabah” gazeti “Türkiýe musulman ýurtlary bilen söwda gatnaşygyny ösdürer” söz başyly habarynda, Söwda ministri Ömer Boladyň musulman ýurtlary bilen Türkiýäniň söwda gatnaşyklarynyň, Türkiýäniň jemi söwda mukdaryndaky paýynyň 2002-nji ýylda 11 göterime deň bolan bolsa, geçen ýyl 26 göterime ýetirendiklerini aýdandygyny ýazýar. Ministr Bolat şol paýy 2030-njy ýyllara çenli 35 göterime ýetirmek üçin iş alyp barýandyklaryny aýtdy.
“Star” gazeti “Türkiýäniň öňbaşçylyk edýän uly taslamasy” söz başyly habarynda, Yragyň Kürt Awtanomiýasynyň Aragatnaşyk we ulaglar ministri Ano Jewheriň Türkiýäniň, Yragyň, Kataryň we Birleşen Arap Emirlikleriniň iş ýüzüne geçirýän Galkynyş ýoly taslamasynyň Pars aýlagyny Türkiýäniň üstaşyr Ýewropa birikdirjekdigini aýdandygyny mälim edýär. Jewher taslamanyň ykdysadyýet üçin uly goşant goşjakdygyny beýan etdi.