“Ýeni Şafak” gazeti “Erdogan: Ysraýyl Liwandan soň gözüni biziň terrotoriýamyza diker” söz başyly habarynda, Prezident R.T.Erdoganyň Türkiýäniň Beýik Millet Mejlisiniň täze kanun çykaryş ýylynyn açylyşynda sözlän sözünde; “Wada berilen ýerler” hyýaly bilen hereket edýän Ysraýylyň hökümetiniň Palestinadan we Liwandan soň gözüni dikjek ýeri biziň territoriýamyz bolar” diýendigine ünsleri çekýär.
“Star” gazeti “Erdoganyň Gaza boýunça çagyryşy” söz başyly habarynda, Prezident R.T.Erdoganyn Finlýandiýanyň Prezidenti Stubb bilen geçiren bilelikdäki metbugat ýygnagynda Gazada gyssagly, durnukly ylalaşygyň ýola goýulmagy we ynsanperwer kömeginiň ýetirilmegi boýunça çagyryşyny ýene-de bir gaýtalap; “Parahatçylygy we howpsuzlygy ýola goýmakdan jogapkär halkara guramalaryň funksiýasyny ýitiren şertlerinde Palestina döwletiniň ykrar edilmegi iňňän möhümdir” diýen sözlerini çap edýär.
“Hürriýet” gazeti “Ruttäniň Türkiýe baradaky ýüzlenmesi” söz başyly habarynda, NATO-nuň täze Baş sekretary Mark Ruttäniň terrorizme garşy göreşiň NATO-nyň çäginde seljerilmelidigini we bu meselede Prezident Erdogan bilen işleşmäge dowam etjekdigini aýdandygyny ýazýar.
“Sabah” gazeti “Stambul howa menzili liderligini tassyklatdy” söz başyly habarynda, merkezi Nýu-Ýorkda ýerleşýän meşhur syýahatçylyk žurnaly “Konde Nast Traweleriň” redaktorlarynyň we okyjylarynyň Stambul howa menzilini “Dünýäniň iň gowy howa menzili” diýip, saýlandygyny mälim edýär.
“Haber Türk” gazeti “Antalýada syýahatçy rekordy” söz başyly habarynda, Antalýanyň şu ýyl jemi 9 aýda 17 milliondan gowrak ýerli we daşary ýurtly syýahatçyny kabul edip, täze rekord goýandygyny ýazýar. Şähere gelen syýahatçy sanyndaky artyşyň mukdary geçen ýylyň degişli döwrüne görä 8 göterime deň boldy.