“Star” gazeti “Erdogan BMG-niň Baş Assambleýasynda 14-nji gezek çykyş eder” söz başyly habarynda, Prezident R.T.Erdoganyň 24-nji sentýabr sişenbe güni BMG-niň Baş Assambleýasynda 14-nji gezek çykyş etjekdigini ýazýar. Çykyşynyň esasy ugry genosidçi Ysraýylyň Gaza guraýan hüjümleri bilen bagly bolar. Prezident Erdogan halkara jemgyýetçiligini Ysraýylyň hüjümlerine garşy durmaga çagyrar.
“Sabah” gazeti “Fidan ABŞ-nyň Döwlet sekretarynyň Syýasy işlerden jogapkär orunbasarynyň wezipesini ýerine ýetiriji Bassy kabul etdi” söz başyly habarynda, Daşary işler ministri Hakan Fidanyň düýn ABŞ-nyň Döwlet sekretarynyň Adminstratiw işlerden jogapkär orunbasary we Syýasy işlerden jogapkär orunbasarynyň wezipesini ýerine ýetiriji Jon Bassy kabul edendigini ýazýar.
“Haber Türk” gazeti “Gyzyl we çal toparda gözlenýän terrorçylar täsirsiz ýagdaýa getirildi” söz başyly habarynda, İçeri işler ministri Ali Ýerlikaýanyň düýn beren beýannamasynda gyzyl toparda gözlenýän hamala “Amed welaýaty” diýilýän sebitden jogapkär “Hebun Piro Amed” kodly Zyraw Taş bilen çal topardan gözlenýän “Botan” kodly Fehmi Başkurduň täsirsiz ýagdaýa getirilendigini aýdandygyny okyjy köpçüliginiň dykgatyna ýetirýär.
“Hürriýet” gazeti “Taýmyň dünýä ägirtleri sanawynda 4 türk firmasy” söz başyly habarynda, dünýäniň köp tiražly habar we syýasat žurnallaryndan “Taýmyň” taýýarlan “Dünýäniň İň başarjaň firmalary-2024” sanawynda Türkiýeden 4 firma orun berilendigini mälim edýär. “Sabanjy Holding” firmasy sanawda 405-nji orun eýeläp, türk firmalarynyň hatarynda birinji boldy. “Koç Holding” 499-njy nobatda, Akbank 820 we “Enka” firmasy 887-nji orny eýeledi.
“Watan” gazeti “Antalýa howa menzilinde ýolagçy rekordy” söz başyly habarynda, syýahatçylykda şu ýyl ähli döwürleriň rekorduny goýan Antalýada awgust aýynyň ahyryna çenli 11,7 million daşary ýurtly syýahatçy kabul edilen bolsa, Antalýa howa menziliniň jemi ýolagçy gatnawy 26,6 millionden geçendigini ýazýar.