“Star” gazeti “Erdogan Liwanyň Premýer-ministri Mikati bilen telefon arkaly söhbetdeş boldy” söz başyly habarynda, Prezident R.T.Erdoganyň düýn Liwanyň Premýer-ministri Najip Mikati bilen telefon arkaly söhbetdeşlik geçirendigini ýazýar.
Telefon söhbetdeşliginde Ysraýylyň Liwana guraýan hüjümleri we wehimleri, Gaza guralýan hüjümler hem-de sebitde möwç alýan dartgynlyk hakynda pikir alyşylandygyny ýazýar.Prezident Erdogan telefon söhbetdeşliginde Türkiýäniň Ysraýylyň agressiw syýasatlaryna garşy Liwany goldaýandyklaryny beýan etdi.
Erdogan gijä galmazdan halkara jemgyýetçiliginiň we musulman dünýäsiniň sebitleýin hem-de global parahatçylyga howp salýan Ysraýyla “besdir” diýmelidigini nygtady.
“Hürriýet” gazeti “Daşary işler ministrligi ysraýylly ministre reaksiýa bildirdi” söz başyly habarynda, Türkiýäniň Ysraýylyň Daşary işler ministri Ýisrael Katsyň Prezident R.T.Erdogan hakyndaky günäkärlemelerine berk reaksiýa bildirendigini mälim edýär.
Daşary işler ministrliginden berilen beýannamada; “Ysraýylyň Daşary işler ministriniň Hormatly Prezidentimiz hakynda gödek beýanatyny diňe genosid günäsi bilen jenaýat işine çekilen döwlet resmisine gelişýän çemeleşme hökmünde kabul edýäris. Şeýle töhmetler we ýalanlar, Ysraýylyň eden jenaýatlarynyň üstüni ýapma tagallasynyň bir bölegidir. Türkiýe adalat we parahatçylyk üçin göreşini dowam etdirer” diýilýär.
“Haber Türk” gazeti “Ysraýyly goldaýan ýurtlar pozisiýalaryny seljermeli” söz başyly habarynda, Daşary işler ministri Hakan Fidanyň düýn Polşanyň paýtagty Warşawada beren beýannamasynda Ysraýylyň öz howpsuzlygyny üpjün etmek bahanasy bilen bütin dünýäniň gözüniň öňünde gazalylary gyrýandygyna, millionlarça adamy ýerinden mahrum edendigine ünsi çekip; “Ysraýyla şertsiz goldaw berýän ýurtlar, wagty geçmänkä şol pozisiýalaryny seljermeli” diýen sözlerini okyjy köpçüliginiň dykgatyna ýetirýär.
Fidan NATO agza ýurtlaryň birek-birege sanksiýa goýmaly däldigini beýan etdi.
“Sabah” gazeti “Siriýanyň demirgazygynda 7 PKK terrorçysy täsirsiz ýagdaýa getirildi” söz başyly habarynda, Milli goranmak ministrliginiň Siriýanyň demirgazygyndaky “Ýefrat Galkany” zolagynda 7 PKK/ÝPG terrorçysynyň täsirsiz ýagdaýa getirilendigini mälim edendigini ýazýar.
“Watan” gazeti “2024-nji ýylyň 5 aýynda Stambula 7 million syýahatçy geldi” söz başyly habarynda, dünýä syýahatçylygynyň esasy merkezlerinden biri bolan Stambula ýylyň 5 aýynda 6,9 milliondan gowrak syýahatçynyň gelendigini we onuň rekord dereje hökmünde bellige alynandygyny mälim edýär.