Ýeni Şafak gazedi: "Erdoganyň bütin dünýä Gaza bilen bagly çagyryşy" söz başyly habarynda, Türkiyäniň prezidenti Rejep Taýýip Erdoganyň 7-nji oktýabrdan bäri Gazada 15 müňden gowrak çaganyň we bäbegiň Ysraýyl tarapyndan wagşyçylyk bilen öldürilmegine ünsleri çekendigini habar berýär.
Erdogan bütin dünýä çagyryş berip: "Gazaly bigünä çagalaryň eýýäm ençeme aýlap bombalar bilen öldürilmegine garşy indi anyk ädimler edilmegi barada çagyryş berýärin" diýip nygtady.
Haber Türk gazedi: "Ykdysady programma garaşylandan has gowy işleýär" söz başyly habarynda, Gazna we maliýe ministri Mehmet Şimşegiň Türkiye Respublikasynyň Merkezi bankyna soňky 2 aýda 65 milliard dollardan gowrak pul serişdesiniň girendigini aýdandygyny beýan edýär. Ministr Mehmet Şimşek: "Taryhda ozal görülip eşidilmedik derejede pul serişdesi girýär. Ykdysady programma garaşylandan has gowy işleýär" diýip belledi.
Star gazedi: "Türkiye 6 oba hojalyk önüminiň önümçiliginde, 5 önümiň eksportynda dünýä lideri" söz başyly habarynda, Oba hojalyk we tokaýçylyk ministri Ibrahim Ýumaklynyň Türkiyäniň funduk, çereşnýa, injir, erik, aýwa we kerob önümçiliginde dünýäde 1-nji orundadygyny, funduk, kişde, kakadylan injir, kişmiş we aýwa önümlerinde bolsa dünýä eksportynda 1-nji orundadygyny aýdandygyny mälim edýär.
Hürriýet gazedi: "Türksat 6A-nyň älem giňişligi bilen bagly başdan geçirmeleri başlaýar" söz başyly habarynda, Türksat 6A-nyň älem giňişligine uçurylmak maksady bilen ABŞ-na ugradylandygyny aýan edýär. Emeli hemra iýul aýynyň ilkinji hepdesinde älem giňişligine uçurylar. Türkiye Türksat 6A bilen birlikde aragatnaşyk emeli hemrasyny öndürip bilýän 10 ýurduň biri boldy.
Watan gazedi: "Deňiz önümleriniň önümçiliginde rekord" söz başyly habarynda, Türkiyäniň deňiz önümleriniň önümçiliginde 2023-nji ýylda 2 million tonna golaýlandygyny habar berýär. Oba hojalyk we tokaýçylyk ministri Ibrahim Ýumakly pudaga berilen goldawlar bilen Türkiyäniň taryhynyň rekordynyň täzelenendigini beýan etdi.