Sabah gazedi: "Erdogan Istiklal köçesindäki partlama bilen bagly beýannama berdi" söz başyly habarynda, Prezident Rejep Taýýip Erdoganyň düýn beren beýannamasynda, Stambul şäheriniň Istiklal köçesindäki partlama bilen baglanşykly: "Milletimiz Istiklal köçesindäki hadysanyň jogapkärleriniň hak eden ýagdaýlarynda jezalandyryljakdyklaryna ynansynlar" diýendigini habar berýär.
Hürriýet gazedi: "Soýlu: Hüjümçi göz tussaglygyna alyndy" söz başyly habarynda, Içeri işler ministri Süleýman Soýlunyň Stambul şäheriniň Istiklal köçesindäki partlamany guran hüjümçiniň göz tussaglygyna alynandygyny aýdandygyny mälim edýär.
Watan gazedi: "Penje Gulp operasiýasynda 455 terrorçy täsirsiz ýagdaýa getirildi" söz başyly habarynda, Türkiyäniň Ýaragly güýçleriniň Penje-Gulp operasiýasynyň çäginde şu günki güne çenli 455 terrorçyny täsirsiz ýagdaýa getirendigini, 557 gowagyň we gaçybatalganyň ýok edilendigini okyjy köpçüliginiň dykgatyna ýetirýär.
Star gazedi: "Ispaniýanyň Türkiye bilen bagly karary" söz başyly habarynda, Ispaniýanyň Türkiyäniň howa goranyşyna goşant goşmak maksady bilen ugradan Patriot raketa goranyş ulgamlarynyň we harbylaryň wezipe möhledini 2023-nji ýylyň iýun aýyna çenli uzadandygyny beýan edýär. Milli Goranmak ministri Hulusi Akar Ispaniýanyň Goranmak ministri Margarita Robles bilen duşuşyk geçirip, ýaranlyk ruhuna laýyk hereketleri we goldawy üçin minnetdarlyk bildirdi.
Haber Türk gazedi: "Tekstil we çig mallary pudagynyň ekporty 8,7 milliard dollara ýetdi" söz başyly habarynda, Türkiyäniň Tekstil we çig mallary pudagynyň eksportynyň şu ýylyň ilkinji 10 aýynda 8 milliard 720 million dollara ýetip, ähli wagtlaryň ýanwar-oktýabr aýlary aralygynyň eksport rekordyny goýandygyny aýan edýär.