“Haber Türk” gazeti “Erdogan: goranyş senagatyna maýa goýumlarymyz dowam eder” söz başyly habarynda, Prezident R.T.Erdoganyň Türkiýe daşary ýurtlara garaşlylykdan doly halas edilýänçä goranyş senagatyna maýa goýumlaryň dowam etjekdigini aýdandygyny ýazýar. Geçmişde daşarky garaşlylyk sebäpli agyr ýitgiler çekilendigini nygtan Erdogan; “Türk goranyş senagatynyň önümçilik güýji hasam artar, enşalla ýurdumyz maksatlaryna has çalt ýeter” diýdi.
“Ýeni Şafak” gazeti “Fuat Oktaý: ÝB gumanitar pajygalarda elmydama dymdy” söz başyly habarynda, Prezidentiň orunbasary Fuat Oktaýyň ÝB Komissiýasynyň Başlygy Ursula won der Leýeniň “ÝB, Kiprde iki döwletli çözgüt boýunça hiç zady hiç haçan kabul etmez” diýen sözlerine, “Biz ÝB-niň şu günki güne çenli haksyzlyga, densizlige, Ortaýer deňizinde, Egeýde başdan geçirilen pajygalara, gumanitar apatlara “asla we asla” diýenini görmedik” diýip jogap berendigini ýazýar.
“Watan” gazeti “Akynjy Uçarmansyz hüjüm ulagyy taryha geçdi, ajaýyp rekord” söz başyly habarynda, ýerli we milli şertlerde öndürilen “Akynjy” TİHA-nyň (Uçarmansyz hüjüm ulagynyň” taryhy rekord goýandygyny mälim edýär.
Uzak aralyga uçuş we ýokary belentlik göterilme synagy üçin uçan “Akynjy” TİHA-nyň 38,039 fit belentlige göterildi. Şeýlelikde ilkinji gezek milli şertlerde öndürilen howa ulagy bilen şeýle belentlige ýetildi.
“Sabah” gazeti “Türkiýe OEJD ýurtlarynyň hatarynda maýa goýumlarda iň depginli ösýän ýurtlardan biri” söz başyly habarynda, Gazna we maliýe ministri Lütfü Elwanyň merkezi Londonda ýerleşýän Türk-İňlis Söwda we Senagat Bileşmesiniň Başlygy Alderman Emma Edhemiň ýer eýeçiliginde geçirilen maslahata wideo konferensiýa ulgamy arkaly gatnaşandygyny ýazýar.
Ministr Elwan; “Ykdysady görnüş, özgertmeler boýunça maskatnamalar we ýurdumyzdaky maýa goýum mümkinçilikleri hakynda pikir alyşdyk.Türkiýe OEJD ýurtlarynyň hatarynda maýa goýumlarda iň ýokary depginde ösýän ýurtlardan biri” diýdi.
“Star” gazeti “Türkiýe pandemiýadan ozalky şertlere has gysga möhletde dolanyp barjak 4 ýurtdan biri” söz başyly habarynda, Amerikanyň JPMorgan bankynyň çap eden habarnamasynda, koronawirus pandemiýasyndan ozalky şertlere gysga möhletde dolanyp barjak ösüp barýan ýurtlary mälim edendigine ünsleri çekýär. Habarnamada pandemiýadan ozalky şertlere eýe boljak ösüp barýan ýurtlaryň hatarynda Türkiýäniň, Singapuryň, Hindistanyň we Braziliýanyň bardygy beýan edilýär.