“Ýeni Şafak” gazeti “Çawuşogly: Sewilla kartasyndan el çekiň” söz başyly habarynda, Daşary işler ministri Mewlüt Çawuşoglunyň Gresiýanyň “To Wima” gazetine beren interwýusynda Gresiýanyň Gündogar Ortaýer deňizindäki häkimiýet giňişligini “adalaryň” kontinental şiftine degişlidigi düşünjesi bilen taýarladan Sewilla kartasyna ünsi çekip; “Sewilla kartasyndan el çekilmeli.
Türkiýäniň diňe bir Egeý we Ortaýer deňizinin kenarlary bilen çäkli galjakdygyny pikir etmegiň grek tarapynyň ýalňyş hasabyndan ybratdygyny gaýtalamalyň” diýen sözlerini çap edýär.
“Star” gazeti “Ministr Karaismailogly Garabagyň gaýtadan dikeldilmeginde Azerbaýjan bilen bileklikde işleşjekdiklerini aýtdy” söz başyly habarynda, Ulaglar we infrastruktura ministri Adil Karaismailoglunyň Garabagyň gaýtadan dikeldilmeginde Türkiýe Respublikasynyň tejribeleriniň we gazananlarynyň bölüşiljekdigini, Azerbaýjan bilen egin-egine işleşjekdiklerini aýdandygyny ýazýar.
“Watan” gazeti “Meşhur firma Türkiýede telefon öndürmäge başlady” söz başyly habarynda, Senagat we tehnologiýalar ministri Mustafa Warankyň “Arçelik” firmasy bilen hyzmatdaşlyk edýän “TCL” firmasynyň Tekirdag welaýatynda öýjükli telefon öndürmäge başlandygyny beýan edendigini we global markalara çagyryş edip; “Diňe bir Türkiýe bazarynda däl, eýsem Türkiýeden eksport etmegi hem göz öňünde tutuň” diýen sözlerine ünsleri çekýär.
“Hürriýet” gazeti “Sürüş we atyş synaglaryndan üstünlik bilen geçdi” söz başyly habarynda, Prezidentin ýanyndaky Goranyş senagaty edarasynyň Başlygy İsmail Demiriň Guryýer goşunlary üçin başladylan Sowutly söweş ulagynyň Döwrebaplaşdyryş taslmasynyň çäginde önümçiligi tamamlanan alynky prototipiň sürüş we atyş synaglarynyň üstünlikli tamamlandygyny aýdandygyny mälim edýär.
“Sabah” gazeti “ÝewroLigada” çempion Anadoly Efes! Ergin Ataman taryha geçdi” söz başyly habarynda, THÝ ÝewroLigada taryhynda ikinji gezek final oýnan Anadolu Efes komandasynyň finalda Ispaniýanyň Barselona komandasyny 86-81 hasabynda utup, ÝewroLiganyň çempiony bolandygyny okyjy köpçüliginiň dykgatyna ýetirýär.