Italiýanyň “Inter” topary “Tottenhamdan” daniýaly ýarymgoragçy Kristian Erikseni hataryna goşdy. Transfer bahasy 20 million ýewro diýlip kesgitlenen 27 ýaşly Eriksen “Inter” bilen 4 ýyllyk şertnama baglaşdy. Eriksen ýyllyk 10 million ýewro hak alar.
Angliýanyň “Tottenham” topary PSW-niň gollandiýaly hüjümçisi Stiwen Bergwiýni 5 ýyllyk şertnama bilen transfer etdi. Iňlis kluby 22 ýaşly oýunçy üçin PSW toparyna 27 million funt sterling tölär. Ol täze toparynda 23-nji belgili köýnekçäni geýer.
Ispaniýanyň “Sewilýa” topary “Milanyň” 26 ýaşly ýarymgoragçysy Suso bilen 1,5 ýyllyk kärendesine şertnama baglaşdy. “Sewilýa” topary 2021-nji ýylyň tomsunda ispaniýaly oýunçyny 20 million ýewro töläp, ymykly hataryna hem geçirip biler.
Angliýanyň “Mançester Ýunaýted” topary “Sportingiň” portugaliýaly ýarymgoragçysy Bruno Fernandeş bilen düzümini güýçlendirdi. Iňlis kluby 25 ýaşly oýunçy üçin portugal toparyna 55+25 million ýewro berer. Fernandeş täze topary bilen 5 ýyllyk şertnama baglaşdy.
Germaniýanyň “Herta” (Berlin) topary “Milanyň” polşaly hüjümçisi Kşiştof Pýontegi transfer etdi. Nemes topary 24 ýaşly hüjümçi üçin “Milana” 27 million ýewro tölär. Geçen ýylyň ýanwarynda “Milana” transfer bolan Pýontek täze topary bilen uzak möhletleýin şertnama gol çekişdi.