Tälimçisi Winçenzo Montello bilen şertnamasyny ýene-de 2 ýyl möhlete uzaldan Italiýanyň “Milan” kluby eýýämden transfere 100 million ýewrodan köp pul harçlady. 4 ýyldan soň, şu ýyl ilkinji gezek Ýewrokuboklara gatnaşjak “Milan” “Wilýarrealdan” argentinaly 26 ýaşly goragçy Matteo Musaççiony (18 million ýewro), “Wolfsburgdan” 24 ýaşyndaky şweýsariýaly çep gyraky goragçy Rikardo Rodrigesi (17 million ýewro) hem-de “Portodan” 21 ýaşly portugaliýaly hüjümçi Andre Silwany (38 million ýewro) öz hataryna goşdy. Şeýle hem “Atalantadan” kot-d’Iwuarly ýarymgoragçy Frank Kessini-de 2 ýyllyk kärendesine aldy (8 million ýewro).
Topar 2 täze goragçysy bilen 4, hüjümçi Andre Silwa bilenem 5 ýyla niýetlenen şertnama baglaşdy.* * *Transfer möwsüminiň iň hereketdäki klublarynyň biri-de “Mançester Siti” topary bolup, iňlis kluby “Monakodan” portugaliýaly ýarymgoragçy Bernardo Silwany, “Benfikadanam” braziliýaly derwezeçi Ederson Moraesi transfer etdi. Şäherliler 22 ýaşly Silwa üçin 50, 23 ýaşyndaky derwezeçi üçinem 40 million ýewrony olaryň ozalky klublaryna berer.
Iki oýunçy-da iňlis kluby bilen uzak möhletleýin şertnama baglaşdy. Şeýlelikde, Ederson rowaýaty derwezeçi Jianluiji Buffondan soň, transfer edilen iň gymmat 2-nji derwezeçi boldy.Pep Guardiolanyň tälimçiligindäki “Mançester Siti” hataryndaky Hesus Nawas, Gael Kliçi, Bakari Sanýa, Pablo Sabaleta, Willi Kaballero ýaly oýunçylar bilenem ýoluny aýyrdy.* * *Çabi Alonso bilen Fillip Lamyň futboly taşlamagyndan soň, Germaniýanyň 5 ýyldan bäri çempiony “Bawariýa” öňki ýyldyzlarynyň öwezini 4 oýunçy bilen doldy.
Ançelottiniň tälimçiligindäki topar “Werderden” germaniýaly hüjümçi Serge Gnabri, “Hoffenhaýmdan” ýerli oýunçylar Sebastian Rudi we Niklas Sule hem-de “Liondan” fransiýaly ýarymgoragçy Korentin Tolisso dagy bilen düzümini güýçlendirdi.Olaryň başdaky 2-si 3, soňky 2-si hem 5 ýyllyk şertnama baglaşdy. “Bawariýanyň” 22 ýaşyndaky Tolisso üçin 41,5 million ýewro töländigi habar berildi.* * *“Bundesligany” 2-nji hatarda tamamlan “Leipsig” topary “Galatasaraýyň” portugaliýaly 22 ýaşyndaky ýarymgoragçysy Brumany transfer etdi.
Uzak möhletleýin şertnama baglaşylan oýunçy üçin nemes topary “Galatasaraýa” 15 million ýewro berer.* * *Türkiýäniň “Antalýaspor” topary fransiýaly hüjümçi Žeremi Menes (“Bordo”) bilen 3 ýyla niýetlenen şertnama baglaşdy. 30 ýaşly hüjümçi “Soşoda” futbola başlap, “Monako”, “Roma”, PSŽ, “Milan” we “Bordo” ýaly klublaryň köýnekçesini geýdi.* * *Ýewropa ligasynyň ýeňijisi “Mançester Ýunaýted” Portugaliýanyň “Benfikasyndan” şwesiýaly goragçy Wiktor Lindelöfi hataryna goşdy. 4 ýyllyk şertnama gol çeken 23 ýaşly oýunçynyň transfer bahasy 35+10 million ýewro möçberinde diýlip kesgitlenildi.* * *“Fenerbahçe” (Türkiýe) topary “Lionyň” fransiýaly ýarymgoragçysy Matýö Walbuena bilen düzümini güýçlendirdi.
Türk kluby “Liona” Walbuenanyň transferi üçin 1+1 million ýewro tölär. 32 ýaşly oýunçy mundan öň “Liborn”, “Marsel”, “Dinamo M.” toparlarynda oýnapdy.* * *“Wolfsburgyň” şweýsariýaly derwezeçisi Diego Benalýo mundan soň karýerasyny Fransiýanyň çempiony “Monako” toparynda dowam etdirer. 33 ýaşly derwezeçi täze kluby bilen 3 ýyllyk şertnama baglaşdy.