Dünýä Kubogynyň eýesi, fransiýaly hüjümçi Antuan Grizmann Ispaniýadaky klubuny üýtgetdi. 28 ýaşyndaky oýunçy “Atletiko” toparyndan “Barselona” toparyna transfer boldy.Ol katalonlar bilen 5 ýyllyk şertnama baglaşdy. “Barselona” bu transfer üçin Madrid şäheriniň wekiline 120 million ýewro berer.
Grizmann “Barselonanyň” düzüminde 17-nji belgili köýnekçäni geýer. 2014-nji ýylda “Real Sosiedad” toparyndan “Atletiko Madride” 30 million ýewro transfer bolan Grizmann madridlileriň hatarynda 257 oýunda 133 gezek tapawutlandy.
Fransiýanyň milli ýygyndysynda-da 70 oýunda 29 gol geçiren Grizmann ozalky topary bilen Ýewropa ligasynda ýeňiş gazanypdy.Mundan başga-da “Barselona” ýaponiýanyň “Kaşima Antlers” toparynyň 20 ýaşly hüjümçisi Hiroke Abeni 1 million ýewro transfer etdi. 4ýyllyk şertnama baglaşan Abe “Barselonanyň” “B” toparynda çykyş eder.Çempionlar ligasynyň ýarym finalçysy “Aýaksyň” ýaş futbolçysy Mattiýs De Ligt ahyry transfer boljak toparyny saýlady.
Birnäçe klubuň transfer etmek islän oýunçysy Italiýanyň “Ýuwentus” toparynyň hataryna goşuldy.Turinliler 19 ýaşyndaky goragçy bilen 5 ýyla niýetlenen şertnama baglaşdy. “Ýuwentus” topary De Ligt üçin “Aýaksa” 75 million ýewro berer.
Ol goşmaçalar bilen 85,5 million ýewro çykar. 2016/17 möwsüminde futbola başlan De Ligt “Aýaksda” şu wagta çenli 117 gezek duşuşyk geçirip, şol oýunlarda 13 gezek tapawutlandy. “Ýuwentus” topary Buffon, Remzi, Rabiot, Pellegrini hem-de Demiral ýaly oýunçylary-da hataryna goşdy.Angliýanyň “West Ham” topary Germaniýanyň “Aýntraht” (Frankfurt) toparynyň fransiýaly hüjümçisi Sebastian Haller bilen düzümini güýçlendirdi. “Aýntrahtdan” ozal “Utreht” hem-de “Oser” toparlarynda oýnan 25 ýaşyndaky Haller londonlylar bilen 5 ýyllyk şertnama gol çekişdi.
Futbolçy üçin tölenen 45 million ýewrolyk töleg “West Ham” toparynyň iň gymmat transferi boldy.Ondan öňki rekord 36 million ýewro bilen braziliýaly Felipe Andersona degişlidi.Haller geçen möwsümde 41 duşuşykda 20 gol geçirdi.