ABŞ-nyň täze saýlanan Prezidenti Donald Trampyň Milli howpsuzlyk boýunça maslahatçy wezipesine dalaşgär bolan Maýk Wals, Donald Trampyň we Russiýanyň Prezidenti Wladimir Putiniň arasynda geçirilmegi meýilleşdirilen duşuşyk üçin taýýarlyklaryň dowam edýändigini aýan etdi.
Maýk Wals ABC News kanalyna beren beýannamasynda, Tramp bilen Putiniň arasynda geçirilmegi meýilleşdirilýän duşuşyk bilen bagly "Taýýarlyklar dowam edýär" sözlerini ulandy.
Trampyň ýakyn wagtda Russiýa-Ukraina urşunyň bes edilmegi üçin ädimler etjekdigini aýdan Maýk Wals: "Prezident Trampyň nukdaýnazaryndan beýleki tarap bilen gatnaşyklar we gepleşikler ýola goýmadan ylalaşyk gazanyp bilmersiňiz. Geljek aýlarda ony çürt-kesik ýola goýarys" diýip belledi.
Trampyň ýolbaşçylyk etmegindäki hökümediň Russiýa-Ukraina söweşiniň diplomatik ýollar bilen bes edilmelidigini bilýändigini aýdan Wals, ýaraşyk şertnamasynyň iki tarap üçinem diýseň oňyn ädim boljakdygyny aýtdy.
Wals mundan başgada Gazada ýesirleriň azat edilmegini üpjün etjek ylalaşyk bilen bagly gepleşikleriň "edil häzirki wagtda dowam edýändigini" belläp, Trampyň ýesirleriň azat edilmegine örän çynlakaý çemeleşýändigini, şol sebäpli saýlanan Prezidentiň 20-nji ýanwarda geçiriljek kasam edilşik dabarasyndan ozal ylalaşyga gelinendigini görmek isleýändigini habar berdi.
Trampyň Grenlandiýanyň ýa-da Panama kanalynyň gözegçiligini ele geçirmek üçin harby güýç ulanmak meselesine çynlakaý çemeleşip-çemeleşmeýändigi bilen bagly soraga, Wals Trumpyň iň möhüm meselesiniň ABŞ-nyň Arktika sebitindäki "howplardygyny" beýan etdi.
Maýk Wals: "Donald Tramp ABŞ-nyň güýçli ýagdaýda goralýandygyna göz ýetirmek üçin uly we batyrgaý ädimleri etmäge taýýar" diýip belledi.
Tramp Floridadaky Mar-a-Lago mülkünde respublikan gubernatorlar bilen geçiren duşuşygyndan soň metbugat işgärlerine beren beýanatynda, Wladimir Putiniň özi bilen duşuşyk geçirmek isleýändigini habar beripdi.
Russiýanyň hökümediniň metbugat geňeşçisi Dmitriý Peskow hem Putiniň Tramp bilen duşuşyk geçirmäge taýýardygyny belläp: "Munuň üçin zerur şert ýok" diýipdi.