Möwsümiň 2-nji “Uly tuwulgasy” “Fransiýa Açyk” ýa-da “Rolan Garrosda” erkekleriň arasyndaky çempion belli boldy.Sanawyň 1-2-nji basgançagyndaky tennisçileriň serbiýaly Nowak Jokowiç bilen ispaniýaly Rafael Nadalyň arasyndaky final garaşylyşyndan az çekeleşikli geçdi. 2 sagat 41 minutlap dowam eden finalyň 1-nji setinde 34 ýaşly Nadal 6:0 hasabynda ýeňiş gazandy. 2-nji setde-de erjellik görkezen Nadal 6:2 üstün çykyp, umumy hasaby 2:0-a çykardy. 3-nji setde azda-kände Jokowiç tijense-de, soňlugy bilen, Nadal 7:5 hasabynda öňe saýlanyp, “Rolan Garrosdaky” 13-nji çempionlygyna mynasyp boldy.Toprak kortlaryň ägirdi hasaplanýan Nadal ilkinji çempionlyk gazanan 2005-nji ýylyndan bäri geçirilen 16 ýaryşyň 13-sinde Parižde kubogy asmana göterdi.
Ol bu ýerde soňky 16 ýaryşyň diňe 3-sinde 2009-njy, 2015-nji we 2016-njy ýyllarda kubogy gazanyp bilmedi.Karýerasy boýunça 28 “Uly tuwulga” finalynda oýnan Rafael Nadal 20-nji “Uly tuwulga” kubogyny gazanyp, Rojer Federeriň rekordyna şärik boldy.
100-nji ýeňiş
Bäsleşikdäki 102-nji duşuşygyny oýnan Nadal 100-nji ýeňşini gazandy.Nadal “Rolan Garrosda” diňe 2 duşuşykda ýeňlişe sezewar boldy.Ol bir “Uly tuwulga” ýaryşynda 100 oýunda ýeňiş gazanan 2-nji erkek, umumylykda 5-nji tennisçi boldy.Ondan öňde Federer “Awstraliýa Açyk” we “Wimbledonda”, Serena Williams bilen Kris Ewert “Amerika Açykda”, Martina Nawratilowa bolsa Wimbledonda” 100 ýeňiş gazanypdy.
Şeýle-de Nadal 30 ýaşdan soň, 6-njy gezek “Uly tuwulga” çempionlygyny gazanyp, bu ugurda Jokowiç bilen paýlaşýan rekordynyň ýeke-täk eýesi boldy. Bu duşuşyk 2 tennisçiniň arasyndaky 56-njy oýun bolup, Nadal 27-nji gezek garşydaşyndan üstün çykdy. “Uly tuwulgalarda” 16-njy gezek gabatlaşan tennisçileriň bu hasabatynda Nadal 10-njy gezek ýeňiş gazandy.
4-nji gezek ýeke setde-de ýeňlişsiz çempionlyk
Finala çenli ýeke setde-de ýeňlişe sezewar bolmadyk Nadal aýgytlaýjy oýunda-da bu hasabatyny dowam etdirdi. Şunlukda, ol 4-nji gezek bir setde-de ýeňilmän çempionlyk gazanan ilkinji tennisçi adyny aldy.
Nadal 2008-nji, 2010-njy hem-de 2017-nji ýyllarda-da “Rolan Garrosy” hiç hili set bermezden çempionlyk bilen tamamlapdy.Nadal bu ugurda finalda öň 1976-njy ýylda “Wimbledonda”, 1978-nji we 1980-nji ýyllarda “Rolan Garrosda” ýeke setde hem utulman çempionlyk gazana Býorn Býorg bilen rekordy paýlaşýardy. Nadal ýeňiji hökmünde 1,6 million ýewro, finalçy Jokowiç 850 müň ýewro pul baýragyna laýyk görüldi. Şeýle-de Jokowiç ýeňlendigine garamazdan, ATP-niň sanawynda 1-nji ornuny saklamagy başardy.