23-nji iýulda açylan Tokiýo 2020 tomusky Olimpiýa oýunlaryna Türkmenistandan 9 sany türgeniň gatnaşýandygyny “Türkmenistanyň Hronikasy” owal habar beripdi.
Olimpiýa oýunlarynyň açylanyna 3 gün geçsede, entek haýsyda bir türkmen türgeni medal ugrundaky jemleýji bäsleşiklere gatnaşmaga hukuk gazanmady.
Hökümet tarapdary bolan “Türkmenportal” neşiriniň 25-nji iýulda beren maglumatyna görä, bazar güni türkmen ýüzüjileri bäsleşdiler.
100 metr aralyga ýüzmekde zenanlaryň arasyndaky bäsleşige 19 ýaşly Darýa Semýonowa we erkekleriň arasyndaky ýaryşa 26 ýaşly Merdan Ataýew dagy gatnaşdylar.
Darýa Semýona ilkinji ýaryşda 47 sany ýüzüjiniň arasynda 39-njy orunda pellehana geldi we jemleýji çärýek bäsleşigine gatnaşmaga hukuk gazanmady. Emma, ol Rio-de-Žaneýrodaky olimpiýa oýunlarynda görkezen netijesinden, 3,47 sekunt gowy çykyş etdi.
Merdan Ataýew bolsa, 41 ýüzüjiniň arasynda 34-nji orunda pellehana gelip,jemleýji çärýek ýaryşyna gatnaşmaga hukuk gazanyp bilmedi. Olam Rio-de-Zaneýrodaky netijesinden 1,10 sekunt gowy bäsleşdi.
Emma, Ataýew 200 metr aralygyna ýüzmekde hem bäsleşer diýip neşir ýazýar.
Mundan owal Tokiýodaky Olimpiýada oýunlaryndaky dzýudo ýaryşlaryna gatnaşýan Türkmenistanly ýeke-täk türgen Gülbadam Babamyradowa 52 kilograma çenli ilkinji saýlama ýaryşynda Ysraýylly garşydaşy Gili Koenden ýeňlip, medal ugrunda ýaryşmakdan mahrum boldy diýip, “Türkmenportal” ýazdy.
“TH-niň” owalky maglumatlaryna görä, 2020-nji ýyldaky Tokiýo Olimpiýadasyna Türkmenistandan gatnaşmak hukugyny agyr atletikaçylar Hojamuhammet Toýçiýew (109 kg), Öwez Öwezow (109 kg), Rejepbaý Rejebow (81kg çenli) Polina Gurýewa (59 kg çenli), Kristina Şermetowa (55 kg çenli ), ýeňil atletikaçy Mergen Mämmedow , dzýudoçy Gülbadam Babamyradowa, suwda ýüzüjiler Merdan Ataýew we Darýa Semýonowa dagy gazandylar.
Tokiýo Olimpiýadasyna bäsleşmäge baran Türkmenistanyň delegasiýasyna premýer-ministriň orunbasary, prezidentiň ogly Serdar Berdimuhamedow ýolbaşçylyk edýär.
Ol Olimpiýada ýygyndysyny Tokiýo ýollamak dabarasynda Aşgabatda eden çykyşynda prezident kakasynyň türgenlere ýüzlenmesini okady we onuň “Olimpiýa oýunlarynda ajaýyp üstünlikleri gazanan türgenleriň garaşsyzlygyň 30 ýyllygyna sowgatlar getirjekdigine ynanýandygyny” habar beripdi.
Ýeri gelende bellesek, Tokiýodaky tomusky Olimpiýa oýunlarynda eýýäm, goňşy Özbegistanly, 19 ýaşly taekwandoçy Ulugbek Raşidow 68 kilograma çenli bäsleşikde ýeňiş gazanyp, öz ýurdyna ilkinji Altyn medaly gazandyrdy.
Şol bir wagtda, Özbegistanly 46 ýaşly gimnastikaçy Oksana Çusowitina bolsa, bu Olimpiýada gatnaşyp, sport bilen hoşlaşdy.
Tokiýodaky tomusky Olimpiýa oýunlary 8-nji awgusta çenli dowam edýär.The post Tokiýodaky tomusky Olimpiýa oýunlarynda türkmen türgenleri entek haýsyda bir medal gazanmady, Özbek türgeni eýýäm, altyn gazandy first appeared on Türkmenistanyň Hronikasy.