Her ýyly bolşy ýaly, “Time” žurnaly dünýädäki iň täsirli 100 adamyň
sanawyny ýaýratdy. Sanawa sungat işgärleri, lukmanlar, işewürler we beýleki
ugurlarda iş alyp barýan adamlar girizilipdir.
Geçen ýylyň oktýabrynda
kosmos äleminde uly täzelik boldy. Astronawtlar Kristina Koç hem-de
Jessika Meýr adamzat taryhynda ilkinji gezek ýanlarynda erkek
astronawt bolmazdan açyk kosmosa çykdylar. Iki zenandan ybarat bolan bu topar
Halkara kosmos bekediniň daşyndaky köne Gün batareýalaryny täzeleri bilen
çalyşdylar. Ozal diňe erkek astronawtlara ynanylýan bu çylşyrymly işi ýerine
ýetirjek zenanlar üçin has kiçi bolan kosmonawt eşikleri taýýarlandy. Bu waka
adamzadyň kosmosa çykmagyndan 58 ýyldan, Aýa aýak basmagyndan 50 ýyldan
soňra bolup geçdi. Bu kyn işi bitiren zenan kosmonawtlar sanawda iň köp ünsi
özüne çekýänler boldy.
Hindistanda dünýä inen Sundar Piçai hem bu
sanawa girizilipdir. Ol häzirki wagtda “Google” kompaniýasyna ýolbaşçylyk edýär. Piçai “Google”-yň “Drive”, “Gmail”,
“Kartalar” ýaly hyzmatlarynyň hem kämilleşdirmäge goşant goşdy.
“Formula 1”
ýaryşlarynyň piloty Lewis Hamilton ady rowaýata öwrülen Mihael Şumaheriň rekordyny täzelemegi başardy. “Mercedes” kompaniýasynyň çempion bolmagyny gazanan pilota
sanawda orun berlipdir.
Şu ýyl wideoşekili
maslahatlary, okuwlary geçmäge we habarlaşmaga mümkinçilik berýän “Zoom”
programmasy gysga wagtda köpleriň söýgüsini gazandy. Şol sebäpli bu
programmanyň esaslandyryjysy, Hytaýda doglan amerikaly işewür Erik Ýuan sanawa
girizilipdir.
Nigeriýaly Tunji Funşonyň alyp baran işleri Afrika ýurtlarynda çagalarda ýüze çykýan keseliň doly
aradan aýrylmagyna sebäp bolupdyr. Bu bolsa, lukmanyň bu sanawa girmegine iň
laýyk adamdygyny görkezýär.
“SpaceX” kompaniýasynyň maksatnamalaryna ýolbaşçylyk edýän Gwinn Şotwell “Falcon”
raketa taslamasynyň kämilleşmegine öz goşandyny goşdy. Bu bolsa, kosmosa bolan
gyzyklanmany has hem artdyrdy. Şeýlelikde Şotwel sanawdaky zenanlaryň hataryna
goşuldy.