Türkmenistanyň Futbol federasiýasynyň kubogy ugrundaky ýaryşyň 1-nji tapgyrynyň duşuşyklaryndan soň Merwiň wekili Alibek Abdyrahmanow iň netijeli futbolçylaryň başyny çekýär ― diýip, Janköýer sport saýty ýazýar.
Tejribeli ýarym goragçy 1-nji tapgyrda Aşgabadyň derwezesinden iki pökgi geçirdi. Duşuşykda Merwiň 4:1 hasabynda ýeňiş gazanandygyny ýatladýarys.
Şeýle hem 1-nji tapgyrda Merwden Musa Nurnazarow bilen Toýly Goçnazarow, Aşgabatdan Söhbet Allanurow, Altyn asyrdan Wahyt Orazsähedow, Ahaldan Daýanç Meredow, Şagadamdan Guwanç Abylow dagylar bir pökgüden geçirdiler.
Ahalyň goragçysy Şöhrat Söýünow bolsa ýaryşyň şu möwsüminde öz derwezesine pökgi geçiren ilkini futbolçy boldy.
1-nji tapgyr derwezelere 9 pökginiň geçirilmegi bilen tamamlandy. Diýmek, TFF-niň kubogy ― 2023-iň 10-njy goluna ertirki duşuşyklarda garaşyp bileris.