Düýn, 17-nji iýunda Türkmenistanyň Futbol federasiýasynyň kubogy ugrundaky ýaryşa badalga berildi. Ozal hem habar berşimiz ýaly, ýaryşa 8 topar gatnaşýar. Olaryň 7-si Ýokary liganyň wekilleridir. Ýurdumyzyň häzirki çempiony Altyn asyryň oýunçylarynyň aglabasynyň ýakynda milli ýygyndymyzyň hatarynda Dünýä çempionaty ― 2022-niň saýlama duşuşyklaryna gatnaşyp gelenligi sebäpli, TFF-niň kubogynda bu toparyň ýaşlary ýaryşar.
Hatda ýaryşyň ilkinji duşuşygy hem Altyn asyr II-niň gatnaşmagynda geçirildi. Aşgabat köpugurly sport toplumynda geçirilen duşuşykda topar Energetik bilen güýç synanyşdy. Duşuşygyň A toparçanyň çäginde geçirilendigini ýatdalýarys.
Eýýäm 10-nji minutda Altyn asyr II Şamämmet Hydyrowyň geçiren pökgüsi bilen öňe saýlandy. Şol bir wagtyň özünde bu pökgi TFF-niň kubogy ― 2021-iň ilkinji goly hökmünde bellige alyndy. Ýöne Energetigiň jogaby gijikmedi. 15-nji minutda Orazmuhammet Işangulyýew Mary DES-niň toparynyň hasaby deňlemegine ýardam etdi.
Altyn asyryň ýaş futbolçylary şondan soň hem erjelligini görkezip, birinji ýarym tamamlanýança, garşydaşyň derwezesinden iki pökgi geçirdiler.Bu gezek 32-nji minutda Oraz Orazow, 43-nji minutda Merdan Muhadow tapawutlandy. Şeýle-de bolsa, şu ýyl geçen ýyldaka görä düzümini güýçlendiren Energetik umydy elden bermedi.
Olar Altyn asyr II-niň duşuşykdaky üçünji pökgüsinden iki minut geçensoň, Orazgeldi Seýidowyň geçiren pökgüsi bilen hasaby ýygyrdylar. Şeýlelikde, duşuşygyň birinji ýarymy 3:2 hasabynda Altyn asyr II-niň peýdasyna tamamlandy.
Tersine, ikinji ýarymda üstünlik Energetige gülüp bakdy. Topar 62-nji minutda Serdar Annamämmedowyň geçiren pökgüsi bilen hasaby deňledi. Parahat Jumamyradow bolsa 73-nji minutda 11 metrlik jerime urgusyny dürs ýerine ýetirip, hasaby Energetigiň peýdasyna 4:3-e çykardy. Şol bir wagtyň özünde bu pökgi duşuşygyň ykbalyny kesgitledi.
A toparçanyň indiki tapgyrynda Altyn asyr II Şagadam bilen, Energetik bolsa Aşgabat bilen duşuşar.
TFF-niň kubogy ― 2021. A toparça. 1-nji tapgyr.
Altyn Asyr II ― Energetik ― 3:4
Gollar: 10 Şamämmet Hydyrow, 32 Oraz Orazow, 43 Merdan Muhadow ― 15 Orazmuhammet Işangulyýew, 45 Orazgeldi Seýidow, 62 Serdar Annamämmedow, 73 (11 m.j.u.) Parahat Jumamyradow.