Bazel şäherinde geçirilen Şweýsariýa ýapyk desga (Swiss Indoors) ýa-da täze ady “ATP Bazel” ýaryşynda Rojer Federer 10-njy gezek ýeňiş gazandy.Ol gaty zeminde geçirilýän bu ýaryşyň finalynda awstraliýaly Aleks de Minaury 6:2 hasaplar bilen 2 setde ýeňip, öz doglan şäherinde 10-njy çempionlygyny baýram etdi. Şunlukda, 38 ýaşyndaky şweýsariýaly Rojer Federer karýerasyndaky 103-nji kubogyny asmana göterdi.
Awstriýanyň paýtagtynda geçirilen “Wena Açyk” tennis ýaryşynda ýerli tennisçi Dominik Tim çempion boldy.Ol finalda argentinaly Diego Şwartsman bilen duşuşdy. 1-nji setde argentinaly tennisçi 6:3 hasabynda ýeňiş gazandy. 2-nji setde Tim 6:4 ýeňiş gazanyp, hasaby deňledi.
Final setinde-de 6:3 hasabynda garşydaşyndan üstün çykan Tim Wenadaky ilkinji, karýerasyndaky 16-njy kubogyny gazandy.
Hytaýyň Çžuhaý şäherinde geçirilen “WTA Elite Trophy” tennis ýaryşynda belarusly Aryna Sabalenko ýeňiş gazandy.Ol finalda gollandiýaly Kiki Bertensden 6:4 we 6:2 hasaplar bilen üstün çykdy.
Bu onuň 5-nji WTA çempionlygydyr. 2015-nji ýyldan bäri geçirilip gelinýän bu ýaryşda şu wagta çenli degişlilikde, Wenus Williams, Petra Kwitowa, Julia Görges, Eşli Barti çempion bolmagy başardy.