Toparlaryň arasynda geçirilýän “Hopman” kubogyny şweýsariýaly tennisçiler gazandy.Awstraliýanyň Pert şäherinde geçirilen bäsleşigiň finalynda Şweýsariýa bilen Germaniýa duşuşdy. Çekeleşikli geçen oýunda Rojer Federer bilen Belinda Bençiç ikisi germaniýaly Aleksander Zwerew hem-de Anjelika Kerberden 2:1 hasabynda üstün çykdy.
Federer Zwerewi 2:1, Kerber bolsa, Bençiçi 2:0 hasabynda utdy.Jübütleýin jemleýji oýunda-da şweýsariýalylar 2:0 hasabynda ýeňiş gazanyp, 30-njy gezek geçirilen “Hopman” kubogynda 2001-nji ýyldan soň, 2-nji ýola çempion boldy.* * *Awstraliýanyň başga bir şäheri Brisbanda geçirilen halkara ýaryşda zenanlaryň arasynda ukrainaly Elina Switolina çempion boldy. 23 ýaşly tennisçi finalda belarusly Aliaksandra Sasnowiçi 6:2 we 6:1 hasaplary bilen ýeňip, karýerasyndaky 10-njy WTA çempionlygyny gazandy.
Erkekleriň arasynda-da Täze zelandiýaly Nik Kirgios finalda amerikaly Raýan Harrisondan 2:0 hasabynda üstün çykyp, 4-nji gezek bir bäsleşikde kubogy asmana göterdi.* * *Täze Zelandiýanyň Oklend şäherinde geçirilen “ASB Classic Açyk” çempionatynda germaniýaly zenan tennisçi Juliýa Görges ýeňiş gazandy.
Ol final duşuşygynda daniýaly Karolina Wozniaskini 2 setiň dowamynda utup, 5-nji WTA çempionlyk kubogyny eýeledi.Bu ýerde erkekleriň arasyndaky ýaryş hem şu hepdäniň ahyrynda tamamlanar.* * *Hytaýda geçirilen “Şençžen Açyk” zenanlar tennis bäsleşiginde rumyniýaly Simona Halep çempion boldy. 27 ýaşyndaky tennisçi finalda geçen ýylyň çempiony çehiýaly Katerina Sinýakowany 2:1 (6:1, 2:6, 6:0) hasabynda ýeňdi.
Karýerasyndaky 16-njy kubogyny eýelän Halep bu ýerde 2015-nji ýylda-da ýeňiş gazanypdy.* * *Hindistanyň Pune şäherinde geçirilen erkekleriň arasyndaky “Maharaştra Açyk” bäsleşigi fransiýaly Žill Simonyň ýeňşi bilen tamamlandy. 33 ýaşyndaky tennisçi finalda Günorta afrikaly Kewin Andersony 2:0 hasabynda ýeňlişe sezewar etdi.
Bu onuň 13-nji kubogydyr.* * *“Katar Açyk” erkekleriň arasyndaky ýaryşyň finalynda fransiýaly Gael Monfils bilen russiýaly Andreý Rublew duşuşdy. 6:2 we 6:3 hasaplary bilen ýeňiş gazanan Monfils 7-nji ATP kubogyny eýeledi.