Türki Döwletleriň Guramasynyň Aksakgallar geňeşiniň başlygy Binali Ýyldyrym türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowy bu Geňeşiň Budapeştde geçiriljek 16-njy mejlisine hormatly myhman hökmünde gatnaşmaga çagyrdy.
Türkmenistanyň resmi metbugatynyň habar bermegine görä, çakylyk Binali Ýyldyrym bilen Gurbanguly Berdimuhamedowyň arasynda geçirilen telefon gepleşigiň dowamynda beýan edildi.
B.Ýyldyrym şeýle hem Türkiýe Respublikasynyň Prezidenti Rejep Taýyp Ärdoganyň mähirli salamyny ýetirdi.
Gurbanguly Berdimuhamedow çakylyk üçin minnetdarlyk bildirip, Türkiýäniň Prezidentine öz adyndan hem-de Türkmenistanyň Prezidenti Serdar Berdimuhamedowyň adyndan iň gowy arzuwlaryny beýan etdi.
Söhbetdeşligiň dowamynda taraplar Türkmenistan bilen Türkiýäniň arasynda ikitaraplaýyn gatnaşyklaryň ýokary derejä eýedigini we hyzmatdaşlygy mundan beýläk-de çuňlaşdyrmaga çalyşýandyklaryny nygtadylar.
Gurbanguly Berdimuhamedow Geňeşiň öňde boljak mejlisinde garaljak meseleleriň türki ýurtlaryň arasyndaky gatnaşyklary berkitmäge şert döretjekdigine ynam bildirdi.
Türkmen halkynyň Milli Lideri Binali Ýyldyrymy dekabr aýynda Aşgabatda Halkara Bitaraplyk güni mynasybetli geçiriljek çärelere gatnaşmaga çagyrdy.
Telefon söhbetdeşligiň ahyrynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Türki Döwletleriň Guramasynyň Aksakgallar geňeşiniň başlygy Binali Ýyldyrym birek-birege berk jan saglyk, bagtyýarlyk, iki ýurduň doganlyk halklaryna bolsa parahatçylyk, abadançylyk, rowaçlyk arzuw etdiler.
Neşirimize ýazylmak üçin:
WhatsApp: Biznes Türkmenistan
Telegram: Biznes Türkmenistan
Instagram: Biznes Türkmenistan
X: Biznes Türkmenistan
Dzen: Бизнес Туркменистан