“Disney” şereketiniň önümi bolan “Doňaklyk 2” (Frozen 2) animasiýasy girdejisini 1 milliard dollardan geçiren 45-nji ekran eseri bolupdy.Multfilm geçen 2019-njy ýylyň dowamynda prokata çykan kinolaryň arasynda şeýle görkezijä ýeten 8-nji film bolup, “Disney”-iň 6-njy ekran eseri hökmünde hasaba alnypdy.
Zenan režissýor Jennifer Liniň surata düşüren animasiýasy soňky gazanylan girdejileri hasaba alanyňda bolsa, iň köp gazanç eden animasiýalaryň sanawynda ilkinji orny eýeledi.Multfilm häzirki güne çenli 1 milliard 326 million dollarlyk girdeji toplady.
Kanadaly tanymal aýdymçy Jastin Biber 4 ýyldan soň özüniň ilkinji ýeke (“single”) aýdymyny çykardy. “Yummy” atly bu aýdyma ähli platformalarda ýaýradylan gününden başlap, aýdymçynyň muşdaklary uly gyzyklanma bildirdi. Şeýle-de şu ýylyň dowamynda 25 ýaşly aýdymçynyň täze albomy hem peýda bolar.
Galyberse-de dürli ýurtlarda konsert programmalary bilen çykyş etmegi göz öňünde tutýan aýdymçynyň durmuşy baradaky 10 bölümlik dokumental serial hem sanly ulgam arkaly tomaşaçylaryň dykgatyna ýetiriler.
Dünýäniň iň uly aýdym-saz we sungat festiwaly hasaplanýan Koaçellada (Coachella) çykyş etjek aýdymçydyr toparlar belli boldy.Festiwalda bu ýyl Trewis Skott, Frank Ouşen, “Rage Against the Machine”, Lana Del Reý, Lili Nas X, Kalwin Harris, Karli Rae Jepsen ýaly dünýä belli aýdymçydyr toparlar özleriniň ilhalar eserleri bilen çykyş ederler.
Her ýylyň aprel aýynda ABŞ-nyň Kaliforniýa ştatynyň Indio diýen ýerinde geçirilýän festiwala müňlerçe aýdym-saz muşdagy barýar.Bu ýylky festiwala gatnaşjaklaryň sanynyň 99 müňe ýetmegine garaşylýar.