Aşgabat hem-de Arkadag şäherlerinde geçiriljek Bagtyýarlyk döwrüniň teatr sungaty atly IV halkara festiwala Täjigistanyň M.Wahidow adyndaky döwlet ýaşlar teatrynyň döredijilik topary hem gatnaşar.
Ozal habar berşimiz ýaly, 14 — 16-njy noýabr aralygynda geçiriljek halkara festiwalyň çäklerinde türkmen hem-de daşary ýurtly teatr ussatlary özleriniň festiwala taýýarlan sahna eserleri bilen çykyş ederler.
Täjigistanyň M.Wahidow adyndaky döwlet ýaşlar teatrynyň döredijilik bolsa halkara festiwala gatnaşyjylara Watandan uzakdaky gije atly sahna eserini hödürlär.
Sahna eseri halkara festiwalyň ilkinji güni, ýagny 14-nji noýabrda Türkmenistanyň Beýik Saparmyrat Türkmenbaşy adyndaky baş akademiki drama teatrynda sagat 19:00-da görkeziler.
Bu spektakl sahnany goýan režissýoryň Watan, ene toprak, ata-babalaryň topragyna bolan beýik söýgi, özüňi gurban etmeklik baradaky hyýallary bolup, olar zehinli şahyr Bozor Sobiriň döredijiligi esasynda tomaşaça hödürlenýär. Özüňi aňmak, ata-babalaryňa we döwürdeşleriňe bolan buýsanç ýaly temalara bagyşlanan goşgularyň owadanlygy we many-mazmuny, şeýle hem dürli durmuş meselelerini gozgaýan goşgular bolup, olarda adamyň ýagdaýy, onuň durmuşa we dünýä bolan garaýşy açylyp görkezilýär.
Bularyň hemmesi her bir okyjyny özüne çekýär hem-de ony şol meseleler barada oýlanmaga mejbur edýär.Bu sahnada gürrüň ykbalyň emri bilen ýurdundan alyslara düşen adamyň ykbaly barada barýar.
Muňa garamazdan ol özüniň terk eden Watany, dogan-garyndaşlary barada pikir edýär hem-de Watan we ene toprak baradaky oý-pikirler ondan bir salym hem daşlaşmaýar… Sahnada Abumumin Şarifi baş gahrymanyň keşbinde çykyş edýär.
Belläp geçsek, sahna eseri ilkinji gezek Wahidow adyndaky teatrda 2011-nji ýylda görkezilipdi. Režissýor Nozim Melikow bu spektakly ýurdundan jyda düşen täjik şahyry Bozor Sobiriň goşgularynyň äheňinde goýupdyr.
Spektakl giň köpçülik tarapyndan ykrar edildi. Spektaklyň görkezilişleri Täjigistanyň çäginden daşynda hem guralýar.
Asia-plus Watandan uzakdaky gije spektaklynyň eýýäm Gazagystanda, Russiýada, Moldowada, Gyrgyzystanda we Owganystanda görkezilendigini habar berdi. Indi bolsa bu oýun Türkmenistanda görkeziler.
Oýnuň baş gahrymany Abdumumin Şarifi Demirgazyk Osetiýada geçen milli teatrlaryň Serhetsiz sahna atly VIII Halkara festiwalynda Iň gowy erkek adamyň roly atly baýraga eýe bolupdy.