Fransiýa syýahatçylyk babatda öňdebaryjy ýurtlaryň biri bolup, birnäçe binagärlik gurluşy bilen tapawutlanýar.Meşhur Eýfel diňi, Mon-Sen-Mişel galasy, Şambor köşgi, Ženewa kölüniň kenary, dünýäniň atyr paýtagty Gras şäheri, Lion hem-de Strasburg taryhy şäherleri, Şamoni lyža şypahanasy, Wersal labirint bagy syýahatçylaryň iň gelim-gidimli ýerleridir.
Fransuz instituty bilen Luwruň merkezi meýdançasyny birleşdirýän Pont des Arts pyýada köprüsi hem uly meşhurlyga eýedir.Sena derýasynyň üstünden geçýän bu köpri 1802-1804-nji ýyllar aralygynda gurulýar.
Sungat köprüsi adyny alan pyýada geçelgesi şol döwürde gurlan ilkinji metal köpri bolupdyr. 1975-nji ýylda Fransiýanyň milli taryhy ýadygärlikleriniň hataryna goşulan bu köpri sungat sergileriniň mekanyna öwrülýär. 1991-nji ýylda ÝUNESKO-nyň Bütindünýä mirasynyň sanawyna girizilmegi bilen sungat köprüsiniň meşhurlygy has-da artyp başlaýar.
2008-nji ýylda ýaş jahankeşdeleriň arasynda öz atlary ýazylan gulplary sungat köprüsine dakyp, açaryny Sena derýasyna oklamak däbi başlanýar.Fransuz medeniýetinde beýle däp bolmasa-da, şondan soňra bu dessur wepaly söýginiň alamaty hasaplanyp başlanýar.
Jahankeşdeleriň köp sanlysynyň Fransiýa syýahat etmegi bilen gulplaryň sany 700 müňden hem geçýär.Bu ýagdaý estetiki gözelligi döredip, 2014-nji ýyldan soň köprä gulp asmak däl-de, selfi düşmek ýörgünli däbe öwrülýär.
Fotosuratçylaryň we suratkeşleriň panoramasyna öwrülen sungat köprüsi birnäçe çeper eserlerde, hatda kinofilmlerde hem uly orun aldy. Sungat köprüsi hekaýasy esasynda surata düşürilen filmde (2004ý.), Sabrina filminiň (1995ý.) soňky sahnasynda, Golliwudyň Häzir meni görersiň filminde (2013ý.) sungat köprüsini meşhurlygy görkezilýär.