Şenbe güni ýarygijeden soň UEFA Çempionlar Ligasynyň 68-nji möwsüminiň çempiony belli bolar. Türkiýäniň Stambul şäherindäki 74 müň 753 orunlyk Atatürküň adyny göterýän Olimpiýa stadionynda oýnaljak finalda Angliýanyň “Mançester Siti” topary bilen Italiýanyň “Inter” topary duşuşar. Aşgabat wagty bilen 00:00-da başlanjak bu taryhy finala polşaly Simon Marçiniak eminlik eder.
“Mançester Siti” bu ýaryşda 2021-nji ýyldan soň 2-nji gezek finalda oýnar. Interde bu görkeziji 6-a deň bolup, italýan kluby 1964-nji, 1965-nji hem-de 2010-njy ýyllarda UEFA-nyň iň arzyly kubogyny eýeläpdi. 1967-nji we 1972-nji ýyllarda bolsa finalda garşydaşlaryndan asgyn gelipdi.
“Mançester Siti” topary “G” toparçada “Borussiýa Dortmund”, “Sewilýa”, “Kopengagen”, “Inter” bolsa “C” toparçada “Bawariýa”, “Barselona” hem-de “Wiktoriýa Plzen” toparlary bilen duşuşdy. “Mançester Siti” 2 duşuşygyny golsuz deňme-deň oýnap, 14 utuk bilen toparçada 1-nji orny eýeledi. “Bawariýadan” 2 ýerde-de utulyp, myhmançylykda “Barselona” bilen deňme-deň oýnan “Inter” 10 utuk toplap, toparçany 2-nji orunda tamamlady.
1/8 finalda “Mançester Siti” “Leipsigi” (7-0, 1-1), “Inter” “Portony” (1-0, 0-0) ýaryşdan çykardy. Çärýek finalda “Bawariýany” (3-0, 1-1) ýeňen “Mançester Siti” ýarym finalda soňky çempion “Real Madridden” (1-1, 4-0) üstün çykdy. “Inter” bolsa çärýek finalda “Benfikany” ýeňip, ýarym finalda şäherdeşi “Milandan” rüstem geldi. “Mançester Siti” bilen “Inter” mundan öň ýeke gezek resmi ýagdaýda duşuşyk geçirmedi.
Iki gezek geçirilen ýoldaşlyk duşuşygynda-da hersi 1 oýunda 3-0 hasabynda ýeňiş gazanypdy.
“Transfermarkt”-iň hasaplamalaryna görä Stambulda çykyş etjek 2 toparyň transfer bazaryndaky bahasy 1 milliard 584 million dollara deňdir. “Mançester Sitiniň” gymmaty 1,05 milliard ýewro, Interiň gymmaty bolsa 534,45 million ýewro barabardyr.
Iki toparyň oýunçylarynyň arasynda iň gymmady “Mançester Sitiniň” norwegiýaly hüjümçisi Erling Holann bolup, onuň transfer bazaryndaky nyrhy 170 million ýewro diýlip kesgitlenilýär.
“Interiň” düzümindäki iň gymmat oýunçy bolsa 80 million ýewro baha bilen argentinaly hüjümçi Lautara Martinesdir.