“SpaceX” kompaniýasynyň 4 astronawty äkiden kapsulasy Halkara Kosmos Bekedine birikdi.ABŞ-nyň Aerokosmos edarasy (NASA) bilen hususy kompaniýa bolan “SpaceX”-iň bilelikdäki taslamasynyň esasynda uçurylan “Dragon” kosmos gämisi bilen ilkinji uçuş amala aşyryldy. “Falcon 9” göteriji raketasyna berkidilen “Crew-1” atly kapsula ABŞ-nyň Florida ştatyndaky kosmodromdan ýekşenbe güni agşam uçurylypdy.
Kosmos gämisi 27 sagatdan soňra Halkara kosmos bekedine sag-aman birikdi.Kapsulada NASA-dan Maýk Hopkins, Wiktor Glower, Şannon Wolker hem-de Ýaponiýanyň kosmos barlaglary agentliginden (JAXA) Soiçi Noguçi dagy bolup, olar alty aýlap ol ýerde ylmy tejribelere gatnaşarlar.
Olar bu ýerdäki missiýalara gatnaşmak üçin hususy kompaniýa tarapyndan taýýarlanan taslamanyň çäklerinde uçurylan ilkinji astronawtlar boldular.Astronawtlar HKS-däki beýleki kosmonawtlar ýaly 6 aý töweregi wagt bolarlar.
“SpaceX”-iň “Dragon” kosmos gämisi şu ýylyň maý aýynda synag maksady bilen Robert Benken we Duglas Harlini HKS-a äkidipdi. “Demo-2” atly wezipesini ýerine ýetiren astronawtlar iki aý çemesi ol ýerde bolupdylar.
Ýeri gelende aýtsak, 10 ýyla golaý wagt bäri Halkara kosmos bekedine adamly uçuşlar diňe Russiýanyň “Soýuz” raketalary arkaly amala aşyrylýardy.ABŞ-nyň hususy kompaniýalar bilen şertnamasynyň çäklerinde beýleki kompaniýalar bu ugurda taslama taýýarladylar.
Indi bolsa, olar netije berip başlady. “SpaceX” kosmosa iberýän raketalaryny we kapsulalaryny suwuň ýüzüne gonduryp, gaýtadan peýdalanýar.Bu bolsa, gymmat bahaly hasaplanýan kosmos uçuşlaryny ep-esli derejede arzanladýar.
Mundan başga-da “Boeing” kompaniýasy hem kosmosa uçuşlary ýola goýmak üçin taslama taýýarlaýar.