Russiýanyň Goranmak ministri Sergeý Şoýgu, Russiýanyň territoriýasyna we (bir taraplaýyn häsýetde anneksiýa edilen) Kryma HIMARS we Storm Shadow raketalary bilen guraljak hüjümleriň, ABŞ-nyň we Beýik Britaniýanyň çaknyşyga gönüden goşuljakdygy manysyna geljekdigini, şol ýagdaýda Ukrainadaky karar kabul etmek merkezlerine şol bada zarba saljakdyklaryny mälim etdi.
Russiýanyň Goranmak ministri Sergeý Şoýgu paýtagt Moskwa şäherinde ýokary derejeli harby resmiler bilen geçiren maslahatynda eden çykyşynda, Ukrainanyň goşunynyň 4-nji iýundan bäri rus harby birikmelerine 263 hüjüm gurandygyny, hüjümleriň ählisiniň yzyna serpikdirilendigini habar berdi.
Ukrainanyň goşunynyň Russiýanyň territoriýasyna we bir taraplaýyn häsýetde anneksiýa edilen Kryma HIMARS we Storm Shadow raketalary bilen hüjüm gurajakdygy barada maglumat alandyklaryny aýdan Sergeý Şoýgu: "Şol raketalaryň Russiýanyň alyp barýan ýörite operasiýa zolagynyň çäklerinden daşaryda ulanylmagy, ABŞ-nyň we Beýik Britaniýanyň çaknyşyga gönüden goşuljakdygy manysyna gelýär. Şol bir wagtda Ukrainadaky karar kabul etmek merkezlerine şol bada zarba salynmagyny zerur ýagdaýa getirer" diýip beýan etdi.
2022-nji ýylyň 24-nji fewralynda Russiýanyň Döwlet baştutany Wladimir Putin, Ukrainanyň basylyp alynmagy barada buýruk beripdi, şeýlelik bilen Russiýa-Ukraina söweşi başlapdy.
Putin Kiýewiň NATO agza bolmagynyň öňüni almak we ony Russiýanyň täsiri astynda saklamak üçin ýurduň ýaragsyzlandyrylmagyny we Nasistlerden saplanmagyny maksat edinýändigini beýan edipdi.