Türkmenistanyň Prezidenti Serdar Berdimuhamedow şu ýylyň sentýabrynda BMG-niň Baş Assambleýasynyň 78-nji mejlisinde agzalan Ählumumy howpsuzlygyň strategiýasyny işläp taýýarlamak başlangyjyny tassyklady. Bu barada döwlet Baştutany Bişkekde geçirilýän GDA-nyň döwlet Baştutanlarynyň Geňeşiniň mejlisinde belläp geçdi. Bu barada Türkmenistan: Altyn asyr saýtynda habar berildi.
Döwlet Baştutanynyň belleýşi ýaly, soňky döwrüň halkara wakalary parahatçylygy saklamagyň, howpsuzlygy we durnuklylygy üpjün etmegiň dünýä syýasatynyň ileri tutulýan ugurlary boljakdygyny aýdyňlyk bilen görkezýär.
Türkmenistanyň Prezidentiniň aýtmagyna görä, bu strategiýa möhüm ugurlaryň üçüsini özüne birleşdirmelidir.
Birinji bu gapma-garşylyklaryň we howplaryň öňüni almagyň we aradan aýyrmagyň, olary ýüze çykarýan sebäpleri ýok etmegiň guraly hökmünde öňüni alyş diplomatiýasynyň ýörelgeleridir.
Strategiýanyň ikinji ugry syýasy-hukuk dereje hökmünde oňyn bitaraplygyň kuwwatyndan peýdalanmak bilen baglydyr.
Üçünjiden, Ählumumy howpsuzlygyň strategiýasynda parahatçylygy üpjün etmegiň kepili hökmünde ynanyşmak dialogynyň medeniýetini dikeltmegiň ähmiýetini nazara almak wajyp hasaplanylýar.