Türkmenistanyň gurluşygy, senagaty we energetikasy (CIET-2024) atly halkara maslahaty 2024-nji ýylyň 35-nji noýabry aralygynda Aşgabat şäherinde geçiriljek möhüm wakalaryň biri bolar. CIET-2024 halkara forumy ýurdumyzda we goňşy döwletlerde senagatyň, gurluşygyň we energetikanyň ösmeginde möhüm goşandyny goşmak bilen, ykdysadyýetiň bu pudaklaryna innowasiýa we maýa goýumlaryny çekmek üçin niýetlenendir.
Bu halkara forum Türkmenistanyň Gurluşyk we binagärlik ministrligi, Türkmenistanyň Energetika ministrligi, Türkmenistanyň Senagat we gurluşyk önümçiligi ministrligi, Türkmenhimiýa döwlet konserni, Awtomobil ýollarynyň gurluşygyny dolandyrmak baradaky döwlet agentligi, Türkmenistanyň Söwda-senagat edarasy we Aşgabat şäher häkimligi tarapyndan bilelikde guralyp, ýokary derejede geçiriler.
CIET-2024 halkara forumyň maksady gurluşyk, energetika, jemagat hojalygy, senagat we himiýa senagaty pudaklaryndaky häzirkizaman meseleleri we sebitleýin täze infrastruktura taslamalary ara alyp maslahatlaşmakdan ybaratdyr.Maslahatyň dowamynda elektrik energetikasy, gurluşyk, himiýa we senagat ulgamlaryndaky täze maýa goýum taslamalaryna garalyp geçiler.
Maslahatyň aýratyn plenar mejlislerinde Arkadag şäheriniň gurluşygynyň ikinji tapgyry hakynda, şol sanda lukmançylyk we gaýtadan işleýiş toparlarynyň ulgamlary barada giňişleýin çykyşlar ediler.
Ykdysady sepgitleriň sergisi interaktiw meýdança hökmünde çykyş edip, bu ýerde halk hojalygynyň dürli pudaklary senagat, oba hojalygy, energetika, gurluşyk, ulag we aragatnaşyk pudaklaryndaky ýetilen sepgitler görkeziler. Sergä gatnaşyjylar öňdebaryjy ýerli kärhanalar, ösen tehnologiýalar we ýurdumyzyň ykdysadyýetinde ulanylýan innowasion çözgütler bilen tanşyp bilerler. Sergi özara peýdaly hyzmatdaşlygyň ösmegine goşant goşar.
Kerwen NURÝAGDYÝEW,
Türkmen döwlet binagärlik-gurluşyk institutynyň talyby.