Türkmen talyplary 26-njy fewraldan 4-nji mart aralygynda Rumyniýanyň Ýassy şäherinde geçirilen Halkara Günorta-Gündogar Ýewropa SEEMOUS-2018 matematika olimpiadasynda medallaryň ýedisini eýelediler.
Dünýä ýurtlarynyň ençemesinden, şol sanda Argentinadan, Russiýadan, Gresiýadan, Kiprden, Çehiýadan, Bolgariýadan, Belarusdan, Makedoniýadan, Rumyniýadan we Türkmenistandan talyp ýaşlaryň ýüzden gowragy abraýly aň-paýhas bäsleşigine gatnaşdylar.
Ýurdumyzyň ýygyndy toparynyň hatarynda ýokary okuw mekdepleriniň dördüsiniň—Halkara ynsanperwer ylymlary we ösüş uniwersitetiniň, Magtymguly adyndaky Türkmen döwlet uniwersitetiniň, energetika we oba hojalyk institutlarynyň talyplary çykyş etdiler.
HYYweÖU-nyň birinji ýyl talyby Perman Iljanow, TDU-nyň talyplary--Myrat Çäşemow bilen Bagtyýar Remezanow, şeýle hem TDEI-niň üçünji ýyl taslyby Mekan Hojaýew dagy kümüş medala mynasyp boldular. TOHI-niň 3-nji ýyl talyby Azat Amangeldiýew we TDU-nyň wekilleri- Döwran Nurgeldiýew hem-de Hamitbek Hajyýew bürünç baýrak eýelediler.
Türkmen toparyny halkara olimpiadasyna HYYweÖU-nyň we TDU-nyň mugallymlary degişlilikde Pirmyrat Gurbanow bilen Pälwan Agamyradow dagy taýýarladylar.
Medeni maksatnamanyň çäklerinde olimpiada gatnaşanlar Ýassy şäheriniň taryhy-medeni gözellikleri bilen tanyşdylar.