AFK Çempionlar Ligasynda Günbatar zolagynyň toparçalardaky duşuşyklary tamamlanyp, 1/8 finala çykan klublar belli boldy.
“A” toparçada “Pahtakory” myhmançylykda 4-1 hasabynda ýeňen “Al Feýha” topary 2-nji ýeri eýelemegi başardy. Duşuşykda Sakala (2), Mandaş hem-de Onýekuru arap klubuna ýeňiş getiren gollary geçirdi. “Ahal” bilen toparçanyň lideri “Al-Ain” toparynyň arasyndaky oýunda myhmanlar 2-1 (Rahimi 13 p, Atzili 32 p Tagaýew 35) hasabynda üstün çykdy.
“B” toparçada “Nasaf” myhmançylykda “Al-Sadd” bilen 2-2 hasabynda deňme-deň oýnady. 11 utuk toplan “Nasaf” 1-nji ýeri eýeledi. Kataryň wekili “Al Sadd” toparyna toplan 8 utugy 1/8 finala çykmak üçin ýeterlik bolmady.
“C” toparçada 1/8 finala çykandygy ozal belli bolan “Al-Ittihad” öz meýdançasynda 10 utukly “Sepahan” toparyny 2-1 hasabynda utdy. Bu netijeden soň iki klub hem ýaryşy dowam etdirerler.
“D” toparçada “Al Hilal” öz meýdançasynda Eýranyň “Nassaji Mazandaran” toparyny 2-1 hasabynda ýeňlişe sezewar etdi. Edil şol hasap bilen myhmançylykda “Mumbai Sitini” Iskanderow hem-de Dokiçiň gollary esasynda ýeňen Özbegistanyň “Nawbahor” topary 1/8 finalda oýnamaga hukuk gazandy.
“E” toparçada esasy “Al Nassr” myhmançylykda Täjigistanyň “Istiklol” topary bilen 1-1 hasabynda deňme-deň oýnap, utuklary paýlaşdylar. Duşuşykda arap klubunyň esasy ýyldyzlary meýdança çykmady. Öz meýdançasynda “Al-Duhailden” 2-1 hasabynda asgyn gelen “Persepolis” üçin bäsleşik wagtyndan ir tamamlandy.
Şunlukda, “A” toparçadan “Al-Ain” (BAE), “Al Feýha” (S.Arabystany), “B” toparçadan “Nasaf” (Özbegistan), “C” toparçadan “Al-Ittihad” (S.Arabystany), “Sepahan” (Eýran), “D” toparçadan “Al Hilal” (S.
Arabystany), “Nawbahor” (Özbegistan) hem-de “E” toparçadan “Al Nassr” (S.Arabystany) jemi 8 klub 1/8 finala çykmagy başardy.Saud Arabystanynyň 4 klubunyň hem 1/8 finala çykmagy aýratyn bellenmäge mynasypdyr. Şeýle-de 2 özbek kluby, BAE bilen Eýranyň hem hersinden 1 klub ýaryşy dowam etdirer.
Gündogar zolagyň toparçalardaky 6-njy duşuşyklary geljek hepdede geçiriler we 1/8 finalyň beýleki 5 klubunyň ählisi hem şol oýunlardan soň belli bolar. AFK Çempionlar Ligasynda 1/8 finalyň bijeleri 28-nji dekabrda çekiler. Duşuşyklar bolsa geljek ýylyň fewral aýynda geçiriler.