(Türkmen halk ertekisi)
Günleriň birinde göle, geçi we sakyrtga şärikli ekin ekmäge çykypdyr. Bular bir boşluk meýdana ekin ekjek bolsalar, bir tilki gelip:
− Bu ýer meniň atamdan galan miras ýerdir. Meni hem şärik etmeseňiz, size bu meýdanda ekin ekdirjek däl − diýipdir. Onda göle:
− Bolýar, saňa-da bir paý beräýeris − diýipdir.
Soňra tilki:
− Men size azalyň gulak çöpüni getireýin − diýip gidipdir. Aradan esli wagt geçipdir, emma tilki gara bermändir.
Bular bugdaýy ekip, orup, döwüp harman edende, hälki tilki bir ýerlerden peýda bolupdyr.
Göle tilkini görüp:
− Wiý, tilki dost, sen ýekeje gün hem işlemediň. Sen bu harmana zähmet siňdirmediň. Şonuň üçin saňa hiç zat berjek däl − diýipdir. Onda tilki:
− Geliň, şu ýerden ylgaşalyň! Kim öňürti barsa, harmany şol alsyn. Yza galana zat ýok − diýipdir.
Sakyrtga hem tilkiniň sözüni makullap:
− Geliň, şeýle edeliň − diýipdir.
Muňa hemmesi razy bolupdyr. Ylgaşanlarynda, tilki olardan öňe düşüpdir. Sakyrtga bolsa, bildirmän tilkiniň guýrugyna ýapyşan eken. Tilki hemmeden öň baryp, harmanyň üstünde oturjak bolanynda, sakyrtganyň:
− Waý, meni öldürdiň − diýen sesi eşidilipdir.
Tilki muňa geň galyp:
− Sakyrtga dost, sen haçan geldiň? − diýip sorapdyr.
Onda sakyrtga:
− Aý, meniň bireýýäm harmana gelip, dem-dynjymy alyp oturşym diýip, jogap beripdir.
Şeýdip, harmany büs-bütin sakyrtga almaly bolupdyr. Ýöne akylly sakyrtga bile ekin eken şärikleri göle we geçi bilen harmany paýlaşypdyr. Tilki bolsa, öz emeline özi çolaşyp, hiç zatsyz galypdyr.
Halal zähmet baky döwlet