Russiýanyň “RŽD-Medisina” saglygy goraýyş tory Türkmenistanyň otly düzüminiň binýadynda hereket edýän lukmançylyk toplumyny işläp taýýarlamaga we gurmaga taýýardygyny mälim etdi. Bu barada kompaniýanyň halkara işler boýunça geňeşçisi Iwan Iwanow “Ýagşylyk sapary” (“Missiýa Dobro”) atly maksatnamanyň çäklerinde rus wekiliýetiniň Aşgabada saparynyň dowamynda maglumat berdi diýip, “TASS” habarlar agentligi penşenbe güni habar berdi.
“RŽD-Medisina” kompaniýasynyň halkara işler boýunça geňeşçisi Iwan Iwanowyň sözlerine görä, türkmen tarapy “Keramatly Panteleýmon” atly hereket düzümli maslahat beriş-anyklaýyş merkezini döretmekde rus tejribesine aýratyn gyzyklanma bildirdi. “Transmaşholding” kärhanasy bilen bilelikde durmuşa geçirilen bu täsin taslama 2024-nji ýylyň awgustynda işe girizildi.
“RŽD-Medisina” tehnologiýalary özara alyşmaga we türkmen hyzmatdaşlary üçin şuňa meňzeş toplumy döretmäge taýýardyr. Taslamanyň aýratynlygy dolulygyna rus enjamlaryna esaslanmagynda we dünýäde deňi-taýynyň ýoklugynda jemlenýär diýip, I.Iwanow aýtdy.
“Keramatly Panteleýmon” atly otly doly derejeli hereket düzümli häzirki zaman enjamlar ornaşdyrylan anyklaýyş merkezi özünde jemleýär. Adaty we şöhle arkaly anyklaýyş bölümleri, kliniki barlaghanalar, hirurgiýa bölümi hem-de dermanhana onuň düzümine girýär. Öňdebaryjy hünärmenler bilen uzak aralykdan lukmançylyk maslahatlaryny geçirmäge şert döredýän telelukmançylyk ulgamynyň bolmagy toplumyň aýratynlyklarynyň biridir.
Bu taslama hemişelik lukmançylyk desgalary bolmadyk çetki ýerlerde ýaşaýan ýaşaýjylara ýokary hilli lukmançylyk kömegini bermäge gönükdirilendir.