Russiýanyň Goranmak ministrliginden berilen ýazmaça beýanatda, düýn gije Ukrainanyň Russiýanyň territoriýasynyň çäklerindäki desgalara uçarmansyz howa ulaglary bilen hüjümler guramak isländigi mälim edildi.
Belgorod sebitiniň howa giňişliginde Ukraina degişli 7 sany uçarmansyz howa ulagynyň ýok edilendigi bellenen beýanatda, Kursk sebitiniň howa giňişliginde bolsa 4 sany uçarmansyz howa ulagynyň täsirsiz ýagdaýa getirilendigi aýan edildi.
Ukrainanyň Harby-howa güýçleri serkerdeliginden berilen ýazmaça beýanatda bolsa, düýn gije Russiýanyň Ukrainanyň territoriýasynyň çäklerine Şahed kysymly uçarmansyz howa ulaglary bilen hüjüm gurandygy beýan edildi.
Russiýanyň goşunynyň günorta-gündogar ugurdan 38 sany uçarmansyz howa ulagyny uçurandygy bellenen beýanatda: "26 Şahed kysymly uçarmansyz howa ulagy ýok edildi" diýip habar berildi.
Odessa sebitiniň harby dolanşyk edarasynyň başlygy Oleg Kiper sosial media hasabyndan beren beýanatynda, düýn gije Russiýanyň 2 sagadyň dowamynda Odessa uçarmansyz howa ulaglary bilen hüjüm gurandygyny mälim etdi.
Uçarmansyz howa ulaglarynyň aglabasynyň täsirsiz ýagdaýa getirilendigini aýdan Kiper: "Gynansagam Izmail etrabynda portyň infrastrukturasy nyşana alyndy, 2 adam ýaralandy" diýip maglumat berdi.
Kiper hüjümlerde gözegçilik nokat binasyna we ammarlara zyýan ýetendigini, takmynan 30 ýük awtoulagynyň we 6 tirkegiň ýanandygyny, ýangynyň söndürilendigini beýan etdi.
Beýleki tarapdan Ukraina 22-nji sentýabrda Siwastopolda Russiýanyň Gara deňiz flotynyň ştabynyň nyşana alynmagy netijesinde rus serkerde Wiktor Sokolowyň ölendigini aýan etdi.
2022-nji ýylyň 24-nji fewralynda Russiýanyň Döwlet ýolbaşçysy Wladimir Putin Ukrainanyň basylyp alynmagy barada buýruk beripdi we şeýlelik bilen Russiýa-Ukraina uruşy başlapdy.