Russiýanyň Baş ştabynyň başlygy Waleriý Gerasimow paýtagt Moskwada geçirilen metbugat ýygnagynda daşary ýurtlaryň harby attaşeleriniň gatnaşmagyndaky maslahatda çykyş etdi.
Sebit we halkara howpsuzlygy meselesinde dartgynlylygyň artandygyny aýdan Gerasimow: "Munuň sebäbi, ABŞ-nyň ýolbaşçylygyndaky Günbataryň global agalygyny saklamak we öz düzgünlerini zor bilen ulanmak islegi" diýip belledi.
Gerasimow ABŞ-nyň soňky 10 ýylda Ýewropada, Ýakyn Gündogarda we Afrikada "terrorçylyga garşy göreş" ady bilen krizislere sebäp bolandygyny öňe sürdi we muňa garşy durmalydygyny aýtdy.
Ýewropada soňky wagtlarda dartgynlygyň artandygyny bellän Gerasimow, NATO-nyň giňelýändigini we Russiýa serhedine çenli harby infrastrukturasyny güýçlendirendigini aýtdy.
Gerasimow, NATO-nyň Russiýa serhedindäki işjeňligini artdyrandygyny nygtap: "Alýans güýçleriň uly göwrümli harby türgenleşikleriniň sany şu ýyl 40-a ýetdi. Köp sanda harby bölümler serhetlerimiziň golaýynda hemişelik ýerleşdirildi" diýdi.
Bularyň ählisiniň Ýewropanyň howpsuzlygyny täsir ýetirendigini aýdan Gerasimow, muňa garşy zerur çäreleri görendiklerini aýtdy.
Gerasimow: "Ýakyn Gündogar sebitinde ýagdaý erbetleşýär. Krizisiň sebitleýin urşa öwrülmek töwekgelçiligi bar" diýip aýdan, Russiýanyň Baş ştabynyň başlygy Ukrainadaky söweş barada bolsa Günbataryň Ukraina maddy we harby goldawyny artdyrandygyna, ukrainaly esgerlere tälim bermäge dowam edýändigine ünsleri çekip: "Günbatar ýurtlarynyň Ukraina bilen çaknyşyklara goşulmagy global töwekgelçilikleri döredýär" diýip beýan etdi.
ABŞ-nyň we onuň ýaranlarynyň Ukrainanyň Russiýanyň territoriýasyna uzak aralykly ýaraglar bilen hüjüm guramagyna rugsat berendigini aýdan Gerasimow: "Günbataryň islendik howpuna degişli ýaraglar bilen garşylyk görkezeris" diýdi.