Türkmenistanyň Magtymguly adyndaky Milli sazly-drama teatrynda tanymal pianinoçy, Russiýa Federasiýasynyň at gazanan artisti, Russiýanyň Gnesinler adyndaky saz akademiýasynyň professory Ýuriý Bogdanowyň ýerine ýetirmeginde Iogann Sebastýan Bahyň Partitadan sarabandalar eseriniň ilkinji owazlary tomaşaçylary duýgylar ummanyna atardy.
Konsertde Antonio Wiwaldiniň, Rodion Şşedriniň, Friderik Şopeniň, Pýotr Çaýkowskiniň, Aleksandr Skrýabiniň, Nikolaý Rimskiý-Korsakowyň we beýleki kompozitorlaryň eserleri ýaňlandy.Aýdymçylar Swetana Omelçuk bilen Ýelizaweta Antonowanyň ýerine ýetirijilik usuly owazlara baýlygy we nepisligi bilen aşgabatly tomaşaçylary özüne maýyl etdi.
Mariinka teatrynyň akademiýasynyň artisti Swetana Omelçuk Žorž Bizeniň Karmen operasyndan segidilýasyny ýerine ýetirende näziniň öňünde durup bolmaýan ýesir ediji sygan zenany Karmeniň hut özüni ýada saldy.Köçä çyksam-aýlansam, Oba guşjagazy, Kowusdaky jaňjagazyň owazy ýaly belli eserleri ýerine ýetiren Moskwa oblast filarmoniýasynyň aýdymçysy Ýelizaweta Antonowa aşgabatly saz muşdaklaryny owazlara we žanrlara baý rus halk aýdymlarynyň dürli aýdylyş usullaryndan biri bilen tanyşdyrdy.
Darýa Karplýuk domrada Sergeý Rahmaninowyň Gündogar tansyny, wengerleiň Çardaşyny we neapolitanlylaryň Ezizim eserlerini köňül joşduryjy nepislikde ýerine ýetirdi.Darýa öz halypasy Ýuriý Bogdanowyň Si minor prelýudiýasyny we Bi bemol minor prelýudiýasyny fortepianoda çalyp, diňleýjilere zehininiň ýene bir ugryny görkezdi.
Russiýaly pianinoçy Ýuriý Bogdanow çykyşyny: Türkmenistan biz seniň aşygyň, hökman ýene geleris!diýen sözler bilen tamamlady. Ýürekden çykýan minnetdarlyk sözleri, gül desseleri, awtograflar, diňleýjileriň belli sazandalar bilen bilelikde surat düşmegi saz baýramyna üýtgeşik röwüş berdi. Çäräni ýurdumyzyň Medeniýet ministrligi bilen Russiýa Federasiýasynyň Türkmenistandaky Ilçihanasy guradylar.
Biz myhmanlardan gysgajyk interwýu aldyk. Ýuriý Bogdanow: - Nädip sazanda bolanymy soraýaňyzmy?Ony ata-enemden soramaly.Olaryň aýtmagyna görä, men dokuz aýlykkam aýdyma hiňlenipdirin, özem rus halk aýdymlaryna.
Dört ýaşymda ilkinji saz eserlerimi döretdim.Men çaga döwrümdäki kompozitorlyk synanşyklarymy aýratyn bukjada saklýaryn, olary çuňňur öwrenmeli, ýöne entek onuň wagty gelenok. Öz döreden prelýudilarymyň ikisini aşgabatly tomaşaçylara teklip etdim.
Darýa Karplýuk: - Men Moskwanyň etegindäki Elektrostal şäherinden, şol ýerde hem mamamyň- Žanna Andreýenkonyň adyny göterýän Çagalar sazçylyk mekdebini tamamladym. 6 ýaşdan 8 ýaşyma çenli fortepiano öwrendim, bir gezek domranyň jadyly owazyny eşidenimden oňa maýyl boldum. 13 ýaşymdakam mekdebimize belli pianinoçy Ýuriý Aleksandrowiç Bogdanow geldi.
Sazçylyk mekdebini tamamlanymdam soň professor Bogdanowyň sapak berýän Gnesinler adyndaky RSA-na okuwa girdim.Indi özümem bu ýerde sapak berýärin, şeýle hem Ýuriý Bogdanowyň assistenti.Domra bilen fortepiano bilelikde çalnanda üýtgeşik sazlaşyk döredýär, men gadymy saz guralyna häzirki wagtda ýene gyzyklanma dörändigine begenýärin. Ýelizaweta Antonowa: - Men Woronežde doguldym, halk aýdymlaryny ýerine ýetirýän aýdymçylaryň üçünji nesli. Üç ýaşymda sahna çykdym. 15 ýaşymdan bäri Moskwada. Özümi bilenim bäri ýa saz türgenleşiginde, ýa-da çykyş edýärin.
Meniň halk aýdymlarynda eziz diýarymy, rus halkynyň gözelligini we zehinini wasp edesim gelýär.Swetana Omelçuk: - Aşgabatda bary-ýogy iki gün bolanymyza gynanýaryn.Siziň ajaýyp paýtagtyňyz bilen ýakyndan tanyşmaga mümkinçilik bolar diýip umyt edýärin. Ülkäňiz ne ajap! Ýene bir gezek Türkmenistana gelmäge mümkinçilik döredigi --ony ony elden bermerin.