Ukrainanyň Odessa sebitiniň harby dolandyryş edarasynyň başlygy Oleg Kiper Telegram hasabyndan beren beýanatynda, Rus goşunynyň gijäniň dowamynda Odessadaky porta raketaly hüjüm gurandygyny habar berdi.
Kiper, raketanyň Palau baýdakly gämä degmegi netijesinde, portda işleýän bir Ukraina raýatynyň aradan çykandygyny we daşary ýurtly bolan ekipažyň 5 agzasynyň ýaralanandygyny aýtdy.
Harkow şäheriniň häkimi Igor Terekhow hem Telegram hasabyndan beren beýanatynda, Rus goşunynyň şu gün irden şähere raketaly hüjüm gurandygyny mälim etdi.
Biri 16 ýaşly çaga bolan 16 adamyň ýaralanandygyny aýdan Terekhow, ýumrulan binalaryň aşagynda adamlaryň bardygyny aýtdy.
Zaporožýe welaýatynyň Harby dolandyryş edarasynyň başlygy Iwan Fýodorow hem Telegram kanalyndan beren beýanatynda, Rus goşunynyň düýn gije Zaporožýa guran howa hüjüminde 6 adamyň ýaralanandygyny habar berdi.
Ukrainanyň Sumy welaýatynyň prokuraturasynyň Telegram hasabyndan berilen beýanatda, Rus goşunynyň daňdan welaýata guran hüjüminde 38 ýaşly erkek we 35 ýaşly aýalyň aradan çykandygy habar berildi.
Ukrainanyň Ýaragly Güýçlerine degişli Harby-howa Güýçleriniň Telegram hasabyndan berilen beýanatda, Rus goşunynyň gije Odessa iki sany "Iskander-M" görnüşli ballistik raketa bilen hüjüm gurandygyny habar berdi.
Ruslaryň şeýle hem Ukrainanyň dürli sebitlerine jemi 19 sany "Şahed" görnüşli uçarmansyz howa ulagyny uçarandygy bellenilen beýanatda, Ukrainanyň howa goranyş güýçleri tarapyndan 18-siniň ýok edilendigi, biriniň bolsa Russiýa gaýdyp barandygy aýdyldy.
Ukrainanyň Prezidenti Wladimir Zelenskiý, X hasabyndan beren ýazmaça beýanatynda, Ukrainanyň howa goranyşynyň güýçlendirilmegi üçin hyzmatdaşlardan goldaw talap etdi.
Rus hüjümleriniň öňüni almak üçin ýurdunyň howa goranyş ulgamlarynyň güýçlendirilmelidigine ünsleri çeken Zelenskiý: "Zerur ýaraglara eýe bolan uly ýurtlaryň ýaşaýşy goramak ugrunda hakykatdan-da beýik bolmaklary möhümdir. Bu ýaraglary ammarlarynda saklamaly dälde, PATRIOT we beýleki ähli zatlar hakykatdan-da adamlaryň ýaşaýşyny halas etmek üçin ulanylmalydyr" diýip nygtady.